അതേസമയം, തന്റെ സ്ത്രീത്വത്തെ അപമാനിച്ചുവെന്നും ലൈംഗികാധിക്ഷേപം നടത്തിയെന്നും ആരോപിച്ചുകൊണ്ട് അസോസിയേഷനിലെ ചിലർക്കെതിരെ സാന്ദ്ര കേസ് കൊടുത്തിരുന്നു.

ഗൗരവകരമായ തൻ്റെ ഈ പരാതിയിൽ പൊലീസ് കുറ്റപത്രം നൽകിയിട്ടും പ്രതികളായവർ നിർമാതാക്കളുടെ സംഘടനയിൽ ഭരണാധികാരികളായി തുടരുകയാണ്. ആരോപണവിധേയരായ ഇവർതന്നെ വീണ്ടും മത്സരിക്കുന്നു. ഇങ്ങനെയുള്ള ഭാരവാഹികൾ ഉള്ളയിടത്തു വരുമ്പോൾ ധരിക്കാൻ ഏറ്റവും ഉചിതമായ വസ്ത്രം പർദയായതിനാലാണ് ഇതിട്ടു വന്നത്.” സാന്ദ്രാ തോമസ് പറഞ്ഞു.

മലയാള ചലച്ചിത്ര നിർമാതാക്കളുടെ സംഘടന പുരുഷന്മാരുടെ കുത്തകയാണെന്നും സംഘടനയെ കയ്യടക്കിവെച്ചിട്ടുള്ള കുത്തകകളുടെ മാറ്റത്തിനാണു തന്റെ മത്സരമെന്നും സാന്ദ്ര പറയുന്നു.

മലയാള സിനിമയിലെ ലൈംഗികാതിക്രമങ്ങളെയും പ്രതിസന്ധികളെയും കുറിച്ചു പഠിക്കാൻ നിയോഗിക്കപ്പെട്ട ഹേമ കമ്മീഷന്റെ റിപ്പോർട്ടിനെ തുടർന്ന്, അസോസിയേഷനെതിരെ സാന്ദ്ര നിരവധി ആരോപണങ്ങൾ ഉന്നയിക്കുകയും തുടർന്ന്, സാന്ദ്ര അച്ചടക്ക ലംഘനം നടത്തി എന്നു ചൂണ്ടിക്കാട്ടി അസോസിയേഷൻ അവരെ പുറത്താക്കുകയും ചെയ്തിരുന്നു. 

അസോസിയേഷന്റെ ഈ നടപടിയ്ക്കെതിരെ സാന്ദ്ര എറണാകുളം സബ് കോടതിയില്‍ സമര്‍പ്പിച്ച ഹര്‍ജിയിൽ സാന്ദ്രയെ സംഘടനയില്‍നിന്ന് പുറത്താക്കിയ നടപടി കോടതി സ്റ്റേ ചെയ്തിട്ടുണ്ട്. ഈ സാഹചര്യത്തിലാണ് സംഘടനയുടെ പ്രസിഡന്‍റ് സ്ഥാനത്തേക്ക് മത്സരിക്കാന്‍ സാന്ദ്രയ്ക്കു കഴിയുന്നത്.

എന്നാൽ, തന്‍റെ പത്രിക തള്ളാന്‍ ശ്രമം നടക്കുന്നുണ്ടെന്നു സാന്ദ്ര പറയുന്നു. ‘രണ്ട് സിനിമകള്‍ മാത്രം നിര്‍മ്മിച്ച ആള്‍ എന്നും പറഞ്ഞാണ് അവർ അതിനു ശ്രമിക്കുന്നത്. എന്നൽ, വസ്തുത അതല്ല. ഞാൻ പതിനാറ് സിനിമകൾ നിർമിച്ചിട്ടുണ്ട്. എന്റെ സ്വന്തം പേരിൽ ഒൻപത് സിനിമകൾ സെൻസർ ചെയ്തിട്ടുമുണ്ട്. കഴിഞ്ഞ രണ്ട് സിനിമകൾ വെച്ചിട്ടാണ് അവർ പത്രിക തള്ളാൻ ശ്രമിക്കുന്നത്.

ആദ്യമായാണ് ഒരു വനിത പ്രൊഡ്യൂസേഴ്സ് അസോസിയേഷന്‍ പ്രസിഡന്‍റ് സ്ഥാനത്തേക്ക് മത്സരിക്കുന്നത്. പ്രസിഡന്റായി ജയിച്ച് വരികയാണെങ്കിൽ അടുത്ത തവണ മത്സരിക്കില്ല. പുതിയ ആളുകൾക്ക് അവസരം ഉണ്ടാകണം. ചിലർ പത്ത് പതിനഞ്ച് വർഷം തുർച്ചയായി ഭരിക്കുന്നു. ഇതു ശരിയല്ല. മാറ്റം വേണം. കഴിവുതെളിയിക്കാൻ എല്ലാവർക്കും അവസരം വേണം.’ എന്നും സാന്ദ്ര പറഞ്ഞു.