1913-ൽ രാമാനുജൻ പ്രശസ്ത ബ്രിട്ടീഷ് ഗണിതശാസ്ത്രജ്ഞനായ ഗോഡ്ഫ്രെ ഹരോൾഡ് ഹാർഡി(ജി.എച്ച്. ഹാർഡി) യുമായി കത്തിടപാടുകൾ ആരംഭിച്ചു. ഹാർഡിക്ക് ആദ്യമായി രാമാനുജന്റെ കത്ത് ലഭിച്ചപ്പോൾ, രാമാനുജന്റെ അസാധാരണമായ രീതികളിലും ഔപചാരിക തെളിവുകളുടെ അഭാവത്തിലും രാമാനുജനിൽ അദ്ദേഹം അവിശ്വസനീയനായി.
പക്ഷെ,  രാമാനുജന്റെ സിദ്ധാന്തങ്ങൾ പരിശോധിച്ചപ്പോൾ, രാമാനുജന്റെ പ്രവർത്തനത്തിന്റെ ആഴം ഹാർഡി തിരിച്ചറിഞ്ഞ്, രാമാനുജനെ ഇംഗ്ലണ്ടിലേക്ക് വിളിച്ചു. തുടർന്ന്, മദ്രാസ് സർവകലാശാലയിൽ ഒരു പ്രത്യേക സ്കോളർഷിപ്പും കേംബ്രിഡ്ജിലെ ട്രിനിറ്റി കോളേജിൽ നിന്ന് ഒരു ഗ്രാന്റും രാമാനുജന് അനുവദിക്കപ്പെട്ടു.

1914-ൽ രാമാനുജൻ ഇംഗ്ലണ്ടിലേക്ക് താമസം മാറി. അവിടെ ഹാർഡിയോടൊപ്പം ജോലി ചെയ്തു. തണുത്ത കാലാവസ്ഥയും ദുർബലമായ ആരോഗ്യവും ഉയർത്തിയ വെല്ലുവിളികൾക്കിടയിലും മോഡുലാർ രൂപങ്ങൾ, അഭാജ്യ സംഖ്യാ സിദ്ധാന്തം തുടങ്ങിയ മേഖലകളിൽ ഗണ്യമായ പുരോഗതി കൈവരിക്കാൻ ഹാർഡി- രാമാനുജൻ കൂട്ടുക്കെട്ടിനു സാധിച്ചു. അവരുടെ പങ്കാളിത്തത്തെക്കുറിച്ച് അറിയപ്പെടുന്നതിൽ ഏറ്റവും പ്രധാനപ്പെട്ട കഥകളിൽ ഒന്നാണ്, ‘ഹാർഡി-രാമാനുജൻ സംഖ്യ’ എന്നറിയപ്പെടുന്ന ‘1729’ എന്ന സംഖ്യയുമായി ബന്ധപ്പെട്ട കണ്ടുപിടുത്തം.

ഇംഗ്ലണ്ട് വാസക്കാലത്ത് ഒരിക്കൽ, അനാരോഗ്യത്തെ തുടർന്ന്, ലണ്ടനിലെ പുടിനിയിലെ ആശുപത്രിയിൽ രാമാനുജനെ പ്രവേശിപ്പിച്ചപ്പോൾ, ഹാർഡി അദ്ദേഹത്തെ സന്ദർശിക്കുകയുണ്ടായി. ആ അവസരത്തിൽ സംഭാഷണമദ്ധ്യേ ഹാർഡി, താൻ വന്ന ടാക്സിയുടെ നമ്പർ 1729 ആണെന്ന് രാമാനുജനോടു പറയുകയുണ്ടായി. ‘ആ നമ്പർ മോശമായി തോന്നിയെന്നും ആ വണ്ടിയിൽ വന്നതുകൊണ്ടാണ് താങ്കൾ രോഗശയ്യയിൽ കിടക്കുന്നത് കാണേണ്ടി വന്നതെന്നും’ ഹാർഡി രാമാനുജത്തിനോട് പറഞ്ഞു.

അതുകേട്ടതും രാമാനുജൻ, 1729 എന്ന സംഖ്യ യഥാർത്ഥത്തിൽ വളരെ പ്രത്യേകതയുള്ളതാണെന്ന് ചൂണ്ടിക്കാട്ടി. ‘വ്യത്യസ്തമായ രണ്ട് പോസറ്റീവ് ക്യൂബുകളുടെ തുകയായി എഴുതാവുന്ന ഏറ്റവും ചെറിയ സംഖ്യ(1729 = 1³ + 12³ = 9³ + 10³) ആണ് അത്’ എന്നായിരുന്നു, രാമാനുജൻ തത്സമയം സ്ഥാപിച്ചെടുത്തത്. സാധാരണമെന്ന് തോന്നുന്ന ഈ സംഖ്യയെകുറിച്ചുള്ള ഇത്തരം ഒരു ഉൾക്കാഴ്ച ഗണിതത്തിലുള്ള രാമാനുജന്റെ അസാധാരണമായ അവബോധത്തിന്റെ ഉത്തമ ഉദാഹരണമായി ഉദ്ധരിക്കപ്പെടുന്നു. ഗണിതശാസ്ത്രജ്ഞരായ കെൻ ഓനോയും അമീർ ഡി അക്‌സലും ചേർന്ന് 2016-ൽ പുറത്തിറക്കിയ ‘മൈ സെർച്ച് ഫോർ രാമാനുജൻ: ഹൗ ഐ ലേൺഡ് ടു കൗണ്ട്’ എന്ന പുസ്തകത്തിൽ ‘പുട്ട്നി ആശുപത്രി സംഭവം’ പരാമർശിക്കപ്പെടുന്നുണ്ട്.

1917-ൽ, ഇംഗ്ലണ്ടിൽവെച്ചുതന്നെ ക്ഷയരോഗ ബാധിതനായ രാമാനുജന് 1919ലാണ് ഇന്ത്യയിലേക്ക് മടങ്ങാനുള്ള ആരോഗ്യസ്ഥിതി കൈവന്നത്. രോഗവുമായുള്ള കഠിന പോരാട്ടത്തിനൊടുവിൽ, 1920-ൽ രാമാനുജൻ അന്തരിച്ചു. മരിക്കുമ്പോൾ അദ്ദേഹത്തിനു കേവലം 32 വയസായിരുന്നു പ്രായം.

ഒരു അസാധാരണ പ്രതിഭയായി ലോകമെമ്പാടുമുള്ള ഗണിതശാസ്ത്രജ്ഞർ അംഗീകരിക്കുന്ന രാമാനുജനെ, ലോകപ്രശസ്ത സ്വിസ്സ് ഗണിത- ഭൗതികശാസ്ത്രജ്ഞനായിരുന്ന ലിയോൺഹാർഡ് യൂലർ, ജർമ്മൻ ഗണിതശാസ്ത്രജ്ഞനായിരുന്ന കാൾ ഗുസ്തവ് ജേക്കബ് ജക്കോബി എന്നിവരോടാണ് ലോകം താരതമ്യം ചെയ്യുന്നത്.

1991ൽ, പ്രശസ്ത അമേരിക്കൻ ജീവചരിത്രകാരനും ശാസ്ത്ര എഴുത്തുകാരനുമായ റോബർട്ട് കാനി ഗൽ, ഗണിതത്തിലെ മഹാപ്രതിഭയായ രാമാനുജന്റെ ജീവചരിത്രം, ‘ദി മാൻ ഹു ന്യൂ ഇൻഫിനിറ്റി’ പ്രസിദ്ധീകരിക്കുകയുണ്ടായി. ഇതേപേരിൽതന്നെ 2015ൽ, പ്രശസ്ത ബ്രിട്ടീഷ് നടന്മാരായ ദേവ് പട്ടേൽ രാമാനുജനായും ജെറമി അയൺസ് ഹാർഡിയായും അഭിനയിച്ച സിനിമയും പുറത്തിറങ്ങി.