Published on: January 25, 2025
അച്ഛനിരുന്ന കസേര ഉമ്മറത്തി-
പ്പോഴുമുണ്ട്
അച്ഛൻ്റെ *കാൽമുഖം തുവർത്തി-
ക്കുന്നതുപോലെ
ഇപ്പോഴുമമ്മ തുവർത്തിക്കാ-
റുണ്ട്
പൊടിയുടെ ഒരു പൊടിയുമില്ലാ-
തെണ്ണമയമിപ്പോഴുമുണ്ട്
നെറ്റിയിൽ കൈവച്ച് വഴിയി-
ലേക്ക് കണ്ണുംനട്ട്
കുനിഞ്ഞിരിപ്പുണ്ട് കസേര
മുട്ടിമുട്ടിയൊരു ചുമ ഇട-
യ്ക്കിടെ
തൊണ്ടയിൽ തട്ടിയെത്തി നോക്കുന്ന-
തായി ഒരു തോന്നൽ
ആരോടുമല്ലാതെ ആരോടും
സംസാരിക്കാറുണ്ടച്ഛനിടയ്ക്കിടെ
ചോദ്യവുമുത്തരവും സ്വയമുരുവിടാ-
റുണ്ട്
ഏമ്പക്കത്തിൻ്റെ അകമ്പടി-
യായി നെഞ്ചെരിയുമ്പോൾ
അമ്മയുടെ കട്ടൻ ചായ ഊതിക്കുടി-
ക്കാറുണ്ട്
തേഞ്ഞു തുടങ്ങിയ ചെരിപ്പ്
മങ്ങിയ കട്ടിക്കണ്ണട
തുപ്പൽ കോളാമ്പി
വെളുപ്പിന് ഞാൻ ഉറക്കെഴുന്നേറ്റു
വരുന്നതിനു മുന്നേ വൃത്തിയാക്കി
അമ്മ തെക്കേപ്പറമ്പിലെ കല്ലറയി-
ലേക്ക് നടന്നിരിക്കും
* കാൽമുഖം= പ്രാദേശിക വകഭേദം
പ്രതിഭാവം വാട്സ്ആപ്പ് ഗ്രൂപ്പിലേക്കു സ്വാഗതം🌹
രാജു കാഞ്ഞിരങ്ങാട്: കണ്ണൂർ തളിപ്പറമ്പ് കാഞ്ഞിരങ്ങാട് സ്വദേശി. അധ്യാപകൻ(തളിപ്പറമ്പ് ആർട്സ് & സയൻസ് കോളേജ്). ‘ആസുരകാലത്തോടുള്ള വിലാപം’, ‘കാൾ മാർക്സിന്’, ‘കണിക്കൊന്ന(ബാലസാഹിത്യം), ‘ഒരു സ്ത്രീയും പറയാത്തത്’ എന്നീ കവിതാ സമാഹാരങ്ങൾ പ്രസിദ്ധീകരിച്ചിട്ടുണ്ട്. ‘ബാനത്തെ വിശേഷങ്ങൾ’ എന്ന നോവൽ മലയാള രശ്മി മാസികയിലും, അക്ഷരദീപം മാസികയിലും ഖണ്ഡശ്ശ: പ്രസിദ്ധീകരിച്ചു.
കേരളത്തിലെ പ്രമുഖ സ്വാതന്ത്രസമര സേനാനിയായിരുന്ന ടി. സുബ്രഹ്മണ്യൻ തിരുമുമ്പിന്റെ സ്മരണാർത്ഥം ഏർപ്പെടുത്തിയ ‘ടി. എസ്. തിരുമുമ്പ് അവാർഡ്’, ‘തുളുനാട് മാസിക പുരസ്കാരം’, ചിലങ്കം മാസിക ജനപ്രിയ പുരസ്കാരം, മലയാള രശ്മി മാസിക പുരസ്കാരം, 2018ലും 2019ലും വിരൽ മാസിക പുരസ്കാരം, കേരള വാർത്താ ദിനപത്രം ‘നീർമാതളം പുരസ്കാരം’, ‘പായൽ ബുക്സ് പുരസ്കാരം’ തുടങ്ങി നിരവധി പുരസ്കാരങ്ങൾ ലഭിച്ചിട്ടുണ്ട്. അച്ഛൻ: കല്യാടൻ വീട്ടിൽ കണ്ണൻ നായർ. അമ്മ: കെല്ലറേത്ത് കാർത്ത്യായിനിയമ്മ. ഭാര്യ: അഴീക്കോടൻ ശോഭന. മക്കൾ: രസ്‌ന, രസിക, രജിഷ.
