റിലീസ് ആയി ഒന്നരമാസം പിന്നിടുമ്പോൾ, 300 കോടി ക്ളബിൽ ഇടം പിടിച്ച ഓൾ ടൈം ടോപ് കേരളാ ഗ്രോസ്സർ മൂവി, ലോകഃ ചാപ്റ്റർ 1:ചന്ദ്രയുടെ തകർപ്പൻ വിജയത്തിനു പിന്നാലെ, മലയാളവും കടന്ന് ഇന്ത്യയിലെ ആദ്യത്തെ വനിതാ സൂപ്പര്‍ ഹീറോ ആയി അവരോധിക്കപ്പെടുന്ന കല്യാണി പ്രിയദർശന്റെ പുറത്തു വരാനിരിക്കുന്ന തമിഴ് ചിത്രം ജീനിയിലെ ഒരു ഐറ്റം ഡാൻസ് കണ്ട് ഹൃദയം തകർന്നിരിക്കുകയാണ് കല്യാണിയെന്ന കല്ലുവിന്റെ ആരാധകർ.

ജീനിയിലെ ‘അബ്ദി അബ്ദി’ പാട്ടിനൊപ്പമുള്ള കല്യാണിയുടെ ‘പൊക്കിൾ പെർഫോമൻസ്’ കണ്ട് കണ്ണ് തള്ളിയിരിക്കുകയാണ് അവർ. മലയാളത്തിൽ അല്പസ്വല്പം എക്സ്പോസ്ഡ് ഒക്കെ ആണെങ്കിലും തമിഴിൽ പോയപ്പോൾ കല്ലു ഇത്രയും കടത്തിവെട്ടുമെന്ന് ആരാധകർ ഒട്ടും പ്രതീക്ഷിച്ചില്ല. അതിന്റെ ഞെട്ടലിലാണ് ഇപ്പോൾ അവർ.

‘നമ്മുടെ പ്രിയന്റെ മോളല്ലേ… അവളിങ്ങനെയൊക്കെ ചെയ്യോ…’
എന്ന് അവിശ്വാസത്തോടെ പരിതപിക്കുന്ന സോഷ്യൽ മീഡിയ അമ്മാവന്മാരും അച്ഛൻ സ്ഥാനിയന്മാരും എന്തിന്, മുതുമുത്തശ്ശന്മാർ വരെ കല്ലുവിന്റെ ഈ ‘ദുർനടപ്പിൽ’ ഇപ്പോൾ അതീവ ഖിന്നരരാണ്. ‘ശരീര പ്രദർശനം വേണ്ടായിരുന്നു, അനിയത്തിയെ പോലെയാണു കണ്ടത്’ എന്നു പരിതപിക്കുന്ന കെയറേട്ടന്മാരുടെ ഗദ്ഗദങ്ങളും കണ്ണീരും കല്ലുവിനുള്ള ഉപദേശങ്ങളും കൊണ്ട് സോഷ്യൽ മീഡിയ ഇപ്പോൾ നിറഞ്ഞു കിടക്കുകയാണ്. ‘സായ് പല്ലവിയെ പോലെ കുലീനമായ, നല്ല വേഷങ്ങളിൽ ശ്രദ്ധിക്കൂ…’, ‘ഇങ്ങനെയുള്ള  വേഷങ്ങളിൽ  അഭിനയിക്കക്കാതെ…’, ‘നിന്നെകൊണ്ട് കൊണ്ട് ഇതൊന്നും കൂട്ടിയാൽ കൂടില്ല കല്ലൂ…’ തുടങ്ങിയ ഉപദേശങ്ങളാണ് കല്ലുവിന് ആരാധകവൃന്ദം നല്കികൊണ്ടിരിക്കുന്നത്.

എന്നാൽ, ‘ഇക്കാലത്ത് സ്വന്തം വീട്ടിലെ പെണ്ണുങ്ങളുടെ തുണീടെ നീളം കുറഞ്ഞു വരുന്നത് കണ്ടാലും കണ്ടഭാവം നടിക്കാത്തവന്മാരാണ് ഇപ്പോൾ ആരാന്റെ കൊച്ചിന്റെ തുണീടെ നീളം അളക്കാൻ നടക്കുന്നത്’ എന്ന പതിവു പരിഹാസവും കൊണ്ടാണ് ഈ കെയറേട്ടന്മാരെ മറ്റുചില ആരാധകർ നേരിടുന്നത്.