ഒരാളെ ചേർത്തുനിർത്തി
ശൂന്യരാകുമ്പോഴാണ്
നടന്ന വഴികളിൽ
മുൾച്ചെടികളെ കാണുന്നത്
കൊഴിയാറായ പൂവിന്റെ
ചിരിയിൽ വിതുമ്പുന്നത്
നിലാവിന്റെ മൗനം കോരിക്കുടിച്ച്
പുഴയോളങ്ങളിൽ നെടുവീർപ്പിടുന്നത്
കാടിന്റെയീണത്തിൽ തേങ്ങിക്കരഞ്ഞ്
പൊഴിഞ്ഞുവീണ പഴുത്തിലകളെ
നെഞ്ചോടു ചേർത്തലറുന്നത്
മറവിയെയാഞ്ഞു പുൽകി
നിറങ്ങളെ വികൃതമാക്കി
കറുപ്പണിഞ്ഞ ഗർത്തങ്ങളെ
സ്വപ്നം കാണുന്നത്
കാടകങ്ങളിൽ വഴിതെറ്റി
കരിയിലകളെ വാരിപ്പുതച്ചു നടക്കുന്നത്
ഓർമ്മകളുടെ തീച്ചൂളയിൽ
എരിഞ്ഞു തീരുന്നത്.
രാജലക്ഷ്മി മഠത്തിൽ: മലപ്പുറം ചേളാരി സ്വദേശിനി. ചേർത്തല ശ്രീശങ്കര സ്കൂൾ അദ്ധ്യാപിക. കേരളവാർത്ത പത്രത്തിന്റെ കോളമിസ്റ്റ്. ചേർത്തല സർഗം സാഹിത്യ വേദി എക്സിക്യൂട്ടീവ് മെമ്പർ.
കേരള വാർത്ത ദിനപത്രത്തിന്റെ ‘നീർമാതളം സാഹിത്യ പുരസ്കാരം’, ഇൻഡോ -അറേബ്യൻ കൾച്ചറൽ സൊസൈറ്റി ‘സംസ്കാര ഇന്റർനാഷണൽ പുരസ്കാരം’, തിരുവനന്തപുരം അഷിത സ്മാരക ട്രസ്റ്റിന്റെ ‘അഷിത ഒറ്റക്കവിതാ പുരസ്കാരം’, ‘ഒലി പബ്ലിക്കേഷൻ പുരസ്കാരം’, ‘ആലപ്പുഴ എഴുത്തുകൂട്ടം സാഹിത്യ പുരസ്കാരം’, ‘കോട്ടയം എടുത്തുകൂട്ടം സാഹിത്യ പുരസ്കാരം’ എന്നിവ ലഭിച്ചിട്ടുണ്ട്.
