Published on: January 21, 2025
പ്രണയിക്കാൻ
ആരും ഇല്ലാത്തവൻ്റെ
ചെമ്പരത്തിക്കാടുകളിലേക്ക്
യാത്ര തിരിക്കണം
അപ്പോൾ
പ്രതീക്ഷകളുടെ
വേനൽപ്പറമ്പുകളിലിരുന്ന്
പൂക്കാലം
സ്വപ്നം കാണുന്നവൻ്റെ
കുത്തിക്കുറിപ്പുകൾ
ഒറ്റവാക്കിൽ ഗംഭീരം
എന്നെഴുതി വച്ച്
പാറിപ്പറക്കുന്ന പട്ടങ്ങളെത്തഴുകി
കവിത തുന്നുമ്പോൾ
നോവിന്റെ ചിരിയിൽ പ്രതീക്ഷകളുടെ
നിറം കലരുന്നത് കാണാം.
മരുപ്പച്ച തേടി
അലയുമ്പോഴും പ്രതീക്ഷയുടെ
കിരണങ്ങൾ
ജീവിത പുസ്തകത്തിൽ
വരികളായ് ചേർത്ത്
കാത്തിരിപ്പിന്റെ പുതിയൊരദ്ധ്യായം
തുറക്കുന്നുണ്ട്.
ഹൃദയത്തിന്റെ പാസ്‌വേഡുകൾ
തേടുന്നൊരുവൻ്റെ അവസാന കവിത
വായിക്കപ്പെടുമ്പോൾ
ചെമ്പരത്തിക്കാട് ചുവന്ന് ചുവന്ന്
ഒടുവിൽ
ഇരുൾ പരക്കുന്നു.
⚫
വിഷ്ണു പകൽക്കുറി: കൊല്ലം ചടയമംഗലം സ്വദേശം. തിരുവനന്തപുരം പള്ളിക്കൽ പകൽക്കുറിയിൽ താമസം. ബി.എ. ബിരുദധാരി. ദുബായിൽ ജോലി. എ.അയ്യപ്പൻ സ്മാരക പുരസ്കാരം, ബുക്ക് കഫേ സാഹിത്യ പുരസ്കാരം, മലയാളം സാഹിത്യ ചർച്ചാവേദി പുരസ്കാരം, ദേശീയ മലയാളവേദി സംസ്ഥാന പുരസ്കാരം തുടങ്ങിയ പുരസ്കാരങ്ങൾ ലഭിച്ചു.
മുറിവുതുന്നിയ ആകാശം, അപഥസഞ്ചാരിയുടെ പുലയാട്ട്, ഭാര്യ ഒരു ദുർമന്ത്രവാദിനി എന്നീ കവിതാസമാഹാരങ്ങളും ചക്കപ്പോര് എന്ന രണ്ട് നോവലെറ്റുകളുടെ ആദ്യ കഥാസമാഹാരവും പ്രസിദ്ധീകരിച്ചു. ‘കേരള ബുക്സ് ഓഫ് റെക്കോർഡിൽ ഇടം നേടിയ മാജിക് വേഡ്സ്’,’ റിപ്പബ്ലിക് ഓഫ് പോയട്രി 2024 ലോക കവിത’ തുടങ്ങിയ നിരവധി കളക്ഷനുകളിലും രചനകൾ പ്രസിദ്ധീകരിച്ചിട്ടുണ്ട്.
