2023 റിപ്പബ്ളിക്ക് ദിനത്തിലാണ് രാഷ്രപതി ദ്രൗപദി മുർമുവിൽനിന്നും ചെറുവയൽ രാമൻ ഭാരതത്തിന്റെ പരമോന്നത ബഹുമതികളിലൊന്നായ പദ്‌മശ്രീ സ്വീകരിച്ചത്. എന്നാൽ, അതിനും എത്രയോ മുൻപേതന്നെ കേരളത്തിന്റെ കാര്‍ഷിക രംഗത്ത് എഴുതിചേർക്കപ്പെട്ട പേരാണ് ‘ചെറുവയൽ രാമൻ!’

പരമ്പരാഗത കൃഷിസമ്പ്രദായം കൈമോശം വരുത്താതെ, കേരളത്തിന്റെ കാര്‍ഷിക പൈതൃകത്തെ കാത്തുസൂക്ഷിക്കുന്ന കർഷകനാണ് ഇദ്ദേഹം. ചെറുവയൽ രാമനെ കാണാനും കേൾക്കാനും പഠിക്കാനും രാജ്യാന്തരതലത്തിൽനിന്നുപോലും ഗവേഷകർ വർഷങ്ങളായി ഇവിടെ വന്നു തമ്പടിക്കുന്ന കാഴ്ചകൾ പതിവാണ്.

നിബിഡമായ വനങ്ങളും നിറഞ്ഞു കവിയുന്ന വയലുകളും ഒരേസമയം ഒന്നൊന്നിനോടു മത്സരിക്കുന്ന വയനാട്ടിൽ, മാനന്തവാടിയിൽനിന്നും രണ്ട് കിലോമീറ്റർ താണ്ടി, വള്ളിയൂർക്കാവും കടന്ന്, കമ്മനയിലെ ചെറുവയലെന്ന ചെറുഗ്രാമത്തിലെ ആറോളം ഏക്കർ നിലത്തിൽ, നൂറ്റാണ്ടുകൾ പഴക്കമുള്ള ഫലവൃക്ഷങ്ങളെയും ഔഷധസസ്യങ്ങളെയും ഇന്നും പരിപാലിച്ചു വരികയാണ്, കൃഷിയുടെ ഈ ഉപാസകൻ.

നെൽകൃഷിയ്ക്കുമുണ്ട് ഇത്രയുംതന്നെ ഇടം. കാലാന്തരത്തിൽ, വയനാടിന് അന്യമായത്/ കേരളത്തിനു നഷ്ടമായത് നൂറ്റിയമ്പതിൽപരം നെൽവിത്തുകളാണ്. ഇവയിൽ അറുപതോളം വിത്തിനങ്ങളെ വീണ്ടെടുത്തു സംരക്ഷിച്ചുപ്പോരുന്നു, ചെറുവയൽ രാമൻ എന്നറിയപ്പെടുന്ന തലക്കര ചെറിയ രാമൻ.