ഒറ്റമുണ്ടുപോലുമുടുക്കാത്ത കൊമ്പനും
നഗ്‌നതയെന്തെന്നറിയാത്ത പുള്ളിപ്പശുവും
ഇലക്കീറുകൊണ്ടുപോലും
ലിംഗം മറയ്ക്കാത്ത ചിമ്പാൻസിയും
നഗ്‌നരായി നീന്തിത്തളരുന്ന മീൻകൂട്ടവും
മാവിലിരുന്നു കാഷ്ഠിക്കുന്ന,
തുണിയുടുക്കാത്ത കാക്കയും
മറയ്‌ക്കേണ്ടതൊന്നുമില്ലയെന്റെ
സുന്ദരമേനിയിലെന്നു പറഞ്ഞു
വിരിയുന്ന മയിലും
മറയ്ക്കാത്ത പാമ്പും
മൂടിയ നാണം ചുമക്കാത്ത പഴുതാരയും
എന്നൊടൊപ്പം കഴിയുന്ന
ഈ ഭൂമിയില്‍
എന്നിലെ നഗ്‌നത അശ്‌ളീലമായാൽ
ഉച്ചപ്പിരാന്ത് ആർക്ക്?

നാണിക്കുന്നതെന്തിനു ഞാനെന്റെ
സ്വത്വമാം നഗ്‌നതയിൽ?
ഒളിപ്പിച്ചുവെയ്ക്കാൻ
എന്തുണ്ടെന്റെ ശരീരത്തിൽ?

നിയതിയിലില്ലാത്ത
നഗ്‌നതാ ഫോബിയ
മനുഷ്യകുലത്തിന്റെ മഹാഭ്രാന്ത്:
ചികിൽസകർ തോറ്റുമടങ്ങുന്ന
മനസ്സിന്റെ മാറാച്ചൊറി!