സുഖം കവിതയ്ക്ക് ഇരുപത്തഞ്ചാണ്ട്..!
ദ്വീപിൽ നിന്നുയർന്ന്
ദൂരാകാശമാർഗ്ഗേ
വൻകരയിലേയ്ക്കു
പറക്കുന്ന
പുഷ്പകം കണ്ട്
ഭൂമിയിൽ നിന്നു
ഞാൻ
മനംപൊട്ടി
മുന്നറിയിപ്പു കൊടുക്കുന്നു
ജനകജേ,
ഭാഗ്യദോഷത്തിൻ
ജന്മമേ,
അയോദ്ധ്യയിലേക്കുള്ള
ഈ
മടക്കത്തിൽ
വൈമാനികൻ
മാറിയെന്നേയുള്ളൂ
സ്വദേശത്തോ
വിദേശത്തോ
വീട്ടിലോ
കാട്ടിലോ
നിനക്കില്ല
മനഃസ്വാസ്ഥ്യം!
■■■
* 2000 ജനുവരിയിൽ, പ്രതിഭാവം പ്രതിമാസ പത്രത്തിൽ പ്രസിദ്ധീകരിച്ച, പ്രശസ്ത എഴുത്തുകാരി, അന്തരിച്ച ഗീതാ ഹിരണ്യന്റെ അവസാനക്കാല കൃതികളിലൊന്നാണ്, ‘സുഖം’. ഗീതാ ഹിരണ്യൻ വിട പറഞ്ഞിട്ട് ഇന്നേക്ക് ഇരുപത്തിമൂന്ന് വർഷം തികയുമ്പോൾ, ഈ കവിത പ്രതിഭാവം ഓൺലൈനിലൂടെ പുനഃപ്രസിദ്ധീകരിക്കുന്നു. ഗീതാ ഹിരണ്യന് പ്രതിഭാവത്തിന്റെ പ്രണാമം…🌹🌷🪷🙏
ഗീതാ ഹിരണ്യനെ കുറിച്ച് 2011 ജനുവരി 7ന്, മാധ്യമം ഗൾഫ് എഡിഷനിൽ മുതിർന്ന മാധ്യമപ്രവർത്തകൻ വി.ആർ. രാജമോഹൻ എഴുതിയ ലേഖനം.
മലയാളത്തിലെ പ്രശസ്ത കഥാകൃത്തും നോവലിസ്റ്റുമായ ലളിതാംബിക അന്തർജനത്തിന്റെ സഹോദരനായ സി. ശ്രീധരൻ പോറ്റിയുടേയും വസുമതിദേവിയുടേയും മകളായി 1958 മാർച്ച് 20 ന് കൊല്ലത്തെ കൊട്ടാരക്കരയിലെ കോട്ടവട്ടത്ത് ജനനം. സുവോളജിയിൽ ബിരുദവും മലയാളത്തിൽ ബിരുദാന്തരബിരുദവും എംഫിലും നേടിയ ഗീതാ ഹിരണ്യൻ, കേരളത്തിലെ വിവിധ സർക്കാർ കലാലയങ്ങളിൽ അദ്ധ്യാപികയായി പ്രവർത്തിച്ചു. കേരള സാഹിത്യ അക്കാദമിയുടെ പബ്ലിക്കേഷൻ ഓഫീസറായിരുന്നു. 1974ലെ മാതൃഭൂമി വിഷുപതിപ്പിൽ എഴുതിയ ‘ദീർഘപാംഗൻ’ എന്ന കഥയിലൂടെ ശ്രദ്ധിക്കപ്പെട്ട അവരുടെ കഥാസമാഹാരങ്ങൾ, ‘ഒറ്റസ്നാപ്പിൽ ഒതുക്കാനാവില്ല ഒരു ജന്മസത്യം’, ‘ഇനിയും വീടാത്ത ഹൃദയത്തിന്റെ കടം’, ‘അസംഘടിത’ എന്നിവയാണ്. ഭൂരിഭാഗവും കഥകളാണ് എഴുതിയിട്ടുള്ളതെങ്കിലും വിരളമായി കവിതകളും എഴുതിയിട്ടുണ്ട്. അർബുദരോഗത്താൽ 2002 ജനുവരി 2 ന് ചരമമടഞ്ഞു. ടി.പി.കിശോർ അവാർഡ്, ജി.ശങ്കരക്കുറുപ്പ് ജന്മശതാബ്ദി കവിതാ പുരസ്ക്കാരം, കുഞ്ചുപിള്ള സ്മാരക അവാർഡ്, അങ്കണം പുരസ്കാരം തുടങ്ങിയ ബഹുമതികൾ ലഭിച്ചിട്ടുള്ള അവരുടെ പേരിൽ, കേരള സാഹിത്യ അക്കാദമി എൻഡൊവ്മെന്റ് ഏർപ്പെടുത്തിയിട്ടുണ്ട്. കവിയും നിരൂപകനും അദ്ധ്യാപകനുമായ അന്തരിച്ച കെ.കെ. ഹിരണ്യനാണ് ഭർത്താവ്. ഉമ, ആനന്ദ് എന്നിവർ മക്കളാണ്.
പ്രതിഭാവം വാട്സ്ആപ്പ് ഗ്രൂപ്പിലേക്കു സ്വാഗതം🌹
ഗീതാ ഹിരണ്യൻ: മലയാളത്തിലെ കഥാകൃത്തും കവയിത്രിയുമായിരുന്ന ഗീതാ ഹിരണ്യൻ കൊല്ലം കൊട്ടാരക്കര കോട്ടവട്ടം സി. ശ്രീധരൻ പോറ്റിയുടേയും വസുമതിദേവിയുടേയും മകളായി 1958 മാർച്ച് 20 ന് ജനിച്ചു. 2002 ജനുവരി 2 ന്, അർബുദരോഗത്താൽ അന്തരിച്ചു.
‘ഒറ്റസ്നാപ്പിൽ ഒതുക്കാനാവില്ല ഒരു ജന്മസത്യം (1999)’, ‘അസംഘടിത(2002)’, ‘ഇനിയും വീടാത്ത ഹൃദയത്തിന്റെ കടം(2002)’, എന്നിവയാണ് പ്രസിദ്ധമായ കഥാസമാഹാരങ്ങൾ. 2009ൽ മരണാന്തര, ‘ഗീതാഹിരണ്യന്റെ കഥകൾ’ എന്ന കഥാസമാഹാരം പ്രസിദ്ധീകരിക്കപ്പെട്ടു. അവർ അവസാനമായി എഴുതിയ കഥ, ‘ശിൽപ്പ കഥയെഴുതുകയാണ്’ എന്ന കഥയും ഈ സമാഹാരത്തിലൂടെ വെളിച്ചംകണ്ടു. ഒറ്റപ്പെട്ട കവിതകൾ എഴുതിയിട്ടുള്ള ഗീതാ ഹിരണ്യന്റെ അവസാന കവിത ‘സുഖം’, 2000 ജനുവരിയിൽ പ്രതിഭാവത്തിൽ പ്രസിദ്ധീകരിക്കപ്പെട്ടു.
ടി.പി.കിശോർ അവാർഡ്, ജി.ശങ്കരക്കുറുപ്പ് ജന്മശതാബ്ദി കവിതാ പുരസ്ക്കാരം, കുഞ്ചുപിള്ള സ്മാരക അവാർഡ് എന്നിവ ലഭിച്ചിട്ടുള്ള ഗീതാ ഹിരണ്യന്റെ പേരിൽ കേരള സാഹിത്യ അക്കാദമി എൻഡൊവ്മെന്റ് ഏർപ്പെടുത്തിയിട്ടുണ്ട്.
1974ൽ മാതൃഭൂമി വിഷുപതിപ്പിൽ പ്രസിദ്ധീകരിച്ച ദീർഘപാംഗൻ എന്ന കഥയിലൂടെയാണ് അവർ മുഖ്യധാരാ സാഹിത്യമേഖലയിൽ ശ്രദ്ധിക്കപ്പെടാൻ തുടങ്ങിയത്. സുവോളജിയിൽ ബിരുദവും മലയാളത്തിൽ ബിരുദാന്തരബിരുദവും എംഫിലും ലഭിച്ചു. കേരളത്തിലെ വിവിധ സർക്കാർ കലാലയങ്ങളിൽ അദ്ധ്യാപികയായി പ്രവർത്തിച്ചുവരവേ, കേരള സാഹിത്യ അക്കാദമിയുടെ പബ്ലിക്കേഷൻ ഓഫീസറായി നിയമിതയായെങ്കിലും രോഗംമൂലം ആ ജോലിയിൽ പ്രവേശിച്ചില്ല.
ഭർത്താവ്: കവിയും നിരൂപകനും അദ്ധ്യാപകനുമായ കെ. കെ. ഹിരണ്യൻ(late). മക്കൾ: ഉമ, ആനന്ദ്.
