ഓ
രോ വട്ടം മരിക്കണമെന്നു
തോന്നുമ്പോഴും
ഞാനെന്നെയൊരു വെള്ളപ്പുതപ്പിൽ മൂടി
ചത്തെന്നു കരുതും.
പുതപ്പിലേക്കു ഞാനൊട്ടിയമരും.
എന്റെ നേർത്ത തൊലികളിലേക്കവ
അലിഞ്ഞു ചേരും.
എന്റെ ഞരമ്പുകളിലേക്കതിന്റെ
നൂലുകൾ പിണയും;
ഹൃദയം മുറുക്കും.
എന്നെ തിരിഞ്ഞാളുകളെത്തുമ്പോഴേക്കും
ഞാൻ പുതപ്പും
പുതുപ്പ് ഞാനുമായി മാറും.
അവരെന്നെയവിടെ പരതി നോക്കുമ്പോൾ
ഞാൻ മരിച്ചവരുടെ പുഴയിൽ
വിളറിയ വെള്ളയായ്
പൊങ്ങി കിടക്കും.
പക്ഷെ,
ചത്തവരെന്നെയൊറ്റി കൊടുക്കും;
എന്റെ തോലിൽ നിന്ന്
മരണവെള്ളയൂരി എന്നെ
കള്ളിയാക്കും.
ആ പുഴയിൽ നിന്ന്
‘സമയമായില്ല’ എന്നും പറഞ്ഞ്
തോണിക്കാരെന്നെ
തിരിച്ചുകൊണ്ടുവന്നാക്കുമ്പോഴേ
നിങ്ങളെന്നെ മറന്നു പൊയ്കളയും.
പിന്നെ,
ഞാനും ഞാനും
അങ്ങുമിങ്ങും
തുറിച്ചുനോക്കിയൊടുവിൽ
വെള്ള കീറി ഞാനുടുപ്പടിക്കും.
നൂലുകൾ പറിച്ച് ഞാനതിൽ
പൂക്കൾ വരെ തുന്നും.
എന്നിട്ട്,
വെള്ളയുടുപ്പിട്ട മന്ത്രവാദിനിയായി
ഞാൻ ഉയർത്തെഴുന്നേൽക്കും.
എന്നെ കണ്ടു പേടിക്കരുത്.
ആർച്ച. എം. ആർ: പാലക്കാട് കാരാകുർശ്ശി മുഞ്ഞക്കണ്ണി സ്വദേശിനി. ഡൽഹി യൂണിവേഴ്സിറ്റിയിൽനിന്നും ഇംഗ്ലീഷിൽ ഡിഗ്രി. സ്കൂൾ കാലംമുതൽക്കേ ബാലപ്രസിദ്ധീകരണങ്ങളിൽ കഥകളും കവിതകളും പ്രസിദ്ധീകരിച്ചിട്ടുണ്ട്. സംസ്ഥാന സ്കൂൾ കലോത്സവത്തിൽ 2 വർഷം തുടർച്ചയായി കഥാരചനയ്ക്ക് എ ഗ്രേഡ് ലഭിച്ചു.
ചിൽഡ്രൺസ് ലിറ്ററേച്ചർ ഫെസ്റ്റിൽ കഥയ്ക്കും കവിതയ്ക്കും ‘യങ്ങ് ഓതർ അവാർഡ്’, നുറുങ്ങ് മാസിക ഏർപ്പെടുത്തിയ ‘എം.എം.സേതുമാധവൻ കവിതാ പുരസ്കാരം’, വിദ്യാർത്ഥികൾക്കായി ഡിജിറ്റൽ ഫിലിം മേക്കേഴ്സ് ഫോറം ട്രസ്റ്റ് ഏർപ്പെടുത്തിയ, ഗീതാ ഹിരണ്യൻ ‘ഗീതകം നവമുകുള കവിതാ പുരസ്ക്കാരം’, കൊൽക്കത്ത കൈരളി സമാജം എൻഡോമെന്റ് പുരസ്കാരം, ‘കേളി സാഹിത്യപുരസ്കാരം’, ‘എഴുത്തോല പുരസ്കാരം’ തുടങ്ങിയ പുരസ്ക്കാരങ്ങൾ ലഭിച്ചിട്ടുണ്ട്.
അച്ഛൻ: രാമചന്ദ്രൻ. എം. അമ്മ: സുലോചന.
