Published on: September 3, 2025
ഓണനിലാവിലൊളിക്കും കാശി
ത്തുമ്പേ, തെറ്റീ, മുക്കുറ്റീ…
അത്തം വന്നതറിഞ്ഞീലേ പൂ
ക്കൊട്ട നിറയ്ക്കാന് പോന്നോളൂ!
വേലിയിറമ്പത്തെ കൃഷ്ണക്കിരീടത്തില്
താളം തുള്ളുന്നു പൊന്വെയിലും;
കാക്കപ്പൂവിനു സദ്യ വിളമ്പാന്
കാത്തിരുന്നീടുമിളങ്കാറ്റും.
ശംഖുപുഷ്പത്തിന്റെ തോളില് ചാഞ്ഞു
കിന്നാരം ചൊല്ലുന്നു ചെമ്പരത്തി;
നാളത്തെ പൂക്കളച്ചേലില്ച്ചേരാം
മിന്നുന്നൊരോണക്കിനാവായീ!
കണ്ണാന്തളിക്കെന്തേ നാണം? ചൊല്ലൂ,
കണ്ണിലെ കൃഷ്ണമണിപോലെ;
നിന്നെയെതിരേല്ക്കാന് നില്പ്പൂ ചാരേ,
ചെണ്ടുമല്ലിപ്പൂക്കള് നീളേ.
മഞ്ഞപ്പുടവ ഞൊറിഞ്ഞൂ മേലേ
കിങ്ങിണിച്ചേലുകള് തീര്ത്തൂ
മുറ്റത്തഴകു പടര്ത്തീ പൊന്നിന്
പത്തരമാറ്റു കോളാമ്പി.
നിത്യകല്യാണി ചിരിച്ചൂ, ദൂരെ
സ്വസ്ഥമായ് നില്ക്കുമിവളേ
നിത്യവും കാണുന്നതല്ലേ കുഞ്ഞേ
ചിത്തത്തിലെന്നെയും ചേര്ക്കൂ.
കുഞ്ഞിന്റെ ചുïിലൊരീണം
പൊന്നിന് ചിങ്ങനിലാവുപോല് പൂത്തൂ
ഉള്ളം തെളിഞ്ഞവള് പാടീ, കണ്ണി
ലോണപ്പൂച്ചന്തങ്ങള് തിങ്ങീ.
പൂവേ പൊലി പൂവേ പൊലി പൂവേ…
ഓണപ്പതിപ്പ് പുസ്തകരൂപത്തിൽ വായിക്കുക
പ്രതിഭാവം വാട്സ്ആപ്പ് ഗ്രൂപ്പിലേക്കു സ്വാഗതം🌹
ഗിരിജാ വാര്യർ: പാലക്കാട് സ്വദേശിനി. ഇംഗ്ലീഷിൽ ബിരുദാനന്തരബിരുദവും SET ഉം നേടി. 2020ൽ, പുതുപ്പരിയാരം ഗവൺമെന്റ് ഹയർ സെക്കൻഡറി സ്കൂളിൽനിന്ന് HSST ആയി വിരമിച്ചു. അതേ വർഷം ആദ്യത്തെ കഥാസമാഹാരം ‘ചേക്കുട്ടിപ്പാവ’ പുറത്തിറങ്ങി.
തുടർന്ന്, ‘വെള്ളക്കൊക്കുകൾക്കും പറയാനുണ്ട്’, ‘അഞ്ചു കാക്കകൾ’, ‘പാർത്ഥന്റെ വീട്’ എന്നീ ചെറുകഥാ സമാഹാരങ്ങളും ‘ചായക്കൂട്ട്’, ‘ഋതുസംഹാരം’ എന്നീ കവിതാ സമാഹാരങ്ങളും പ്രസിദ്ധീകരിക്കപ്പെട്ടു.
‘എം. സുകുമാരൻ സ്മാരക ചെറുകഥാ പുരസ്കാരം’, കാഞ്ഞങ്ങാട് ‘സപര്യ സാംസ്കാരിക സമിതി പുരസ്കാരം’,
‘തപസ്യ കലാസാഹിത്യവേദി കവിതാ പുരസ്കാരം’, ബാലസാഹിത്യകാരൻ പറവൂർ ‘പുത്തൻവേലിക്കര സുകുമാരൻ സ്മാരക കവിതാ പുരസ്കാരം’, എഴുത്തുപുര സാഹിത്യ സമിതിയുടെ ‘മാധവൻകുട്ടി ആറ്റാഞ്ചേരി കവിതാ പുരസ്കാരം’, ‘അങ്കണം ഷംസുദ്ദീൻ കവിതാ പുരസ്കാരം’ തുടങ്ങി വിവിധ പുരസ്കാരങ്ങൾ ലഭിച്ചിട്ടുണ്ട്.
ഭർത്താവ്: ഡോ. രാഘവവാര്യർ. മക്കൾ : അഡ്വ. അഞ്ജനാ വിപിൻ(അബുദാബി), അനികൃഷ്ണൻ(എഞ്ചിനീയർ, യു. കെ.). മരുമക്കൾ: വിപിൻ(അബുദാബി), ഡോ. സുകന്യ വാര്യർ(യു. കെ.). കൊച്ചുമക്കൾ: ആഗ്നേയ് വിപിൻ, മാധവ്. എ. എസ്. വാര്യർ.
