ഒരു ചെടിയും മരവും
മറ്റൊന്നിനെ കുറ്റം പറയാറില്ല
ഒന്നിലും മതിമറക്കാറില്ല
സ്വയം മറന്നു കുതിക്കാറില്ല
അനശ്വരതയെക്കുറിച്ച്
വേപഥു കൊള്ളാറില്ല
സങ്കടക്കടലിൽ മുങ്ങിമരിക്കാറില്ല

സമീപത്തെത്തുമ്പോൾ
തണുത്ത കൈകൾ നീട്ടിത്തൊടും
വിരിഞ്ഞ പൂക്കൾ നീട്ടി
സ്വാഗതം ചൊല്ലും
തലേന്നത്തെ നിലാവിനെയും
രാത്രിയിൽ പെയ്ത മഞ്ഞിനെയും
അന്നത്തെ പുലരിയെയും
വെളിച്ചത്തെയും കുറിച്ച്
വാചാലരാവും
വൈകി വന്ന കാറ്റിനെക്കുറിച്ച്
തമാശ പറയും
അവയുടെ മണ്ണിൽ അപ്പോഴും
നനവുള്ള നീർച്ചാലുകൾ നാളെയെന്ന
ശുഭപ്രതീക്ഷ തരും
വരിതെറ്റാതെ പോകുന്ന ഉറുമ്പിൻ കൂട്ടം
ചിട്ടയെന്തെന്നു പഠിപ്പിക്കും
വിളഞ്ഞു പാകമായി മാത്രം താഴോട്ടു വീണ
ഒരു പഴം
രംഗം മധുരിപ്പിക്കും
കൊമ്പിലിരുന്ന്
അനന്തസാധ്യതകളുടെ
വിശാലമായ ആകാശത്തെക്കുറിച്ച്
പാടുന്ന കിളികൾ
യാത്രയിലേക്ക് ക്ഷണിക്കും

കഴിഞ്ഞ നാൾ ഉറക്കം കെടുത്തിയ
താരതമ്യങ്ങൾ, അസൂയകൾ,
ആശങ്കകൾ, ഉൽകണ്ഠകൾ,
വിമർശനം, അഹന്ത, വിഷാദം,
സമയക്കുറവ്, കൂടുതൽ,
യുദ്ധം, ബോംബ്, മിസൈലുകൾ,
കവർച്ച, കൊലപാതകം,
അതിർത്തിത്തർക്കം, പലായനം,
ബലാത്സംഗവാർത്തകൾ
അപ്പോൾ എങ്ങോ പോയ്മറയും

ചെടികൾ, മരങ്ങൾ
മനുഷ്യരെപ്പോലെയല്ല
ഇരുട്ടിൽ ആക്രമിക്കുകയോ
വെളിച്ചത്ത് പരിഹസിക്കുകയോ ഇല്ല
ജാതിയെ, മതത്തെ, നിറത്തെ
ഓർമ്മിപ്പിക്കാറില്ല
അവർക്കൊന്നിനെയും ഭയമില്ല
അധികാരമോ അംഗീകാരമോ വേണ്ട
അവസരങ്ങൾക്കായി കാത്തു നില്ക്കാറില്ല
അവരെ വിശ്വസിക്കാം
ഉപാധികളില്ലാതെ സ്നേഹിക്കാം

അവർ സ്വപ്നം കാണാൻ പഠിപ്പിക്കുന്നു
വിടർത്തിയിട്ട കൈകൾ
ആശ്രയമെന്ന ഉറപ്പു തരുന്നു
തളിർക്കുന്ന ഇലകളിൽ പ്രതീക്ഷയുടെ
മന്ത്രമാലേഖനം ചെയ്തിരിക്കുന്നു
ആഴത്തിൽ പടരുന്ന വേരുകളിൽ
ബന്ധത്തിന്റെ കരുത്ത്
ഉൾച്ചേർത്തിരിക്കുന്നു
ഓർമ്മയുടെ പാടുകൾ
അവശേഷിപ്പിക്കാതെ
ഭൂമിയിലേക്കു മടങ്ങേണ്ടതെങ്ങനെയെന്നു
പറയുന്നു

ചെടിയോ മരമോ ആയി മാറുകയെന്നാൽ
മരണഭയമില്ലാതെയാവുകയെന്നാണ്…
ജീവനകല ആസ്വദിക്കുകയെന്നാണ്…