ഇന്ത്യയിലെ ഏറ്റവും വൃത്തിയുള്ള നദികളിലൊന്നായി കണക്കാക്കപ്പെടുന്ന ഉംഗോട്ട് ഷില്ലോങിന്റെ കിഴക്ക് ഭാഗത്തുനിന്നും ഉത്ഭവിച്ച്, വെസ്റ്റ് ജയന്തിയ ഹിൽസ് ജില്ലയിലെ ദൗകിയിലെ സ്‌നോങ്പെഡങ്‌ എന്ന ഖാസി ട്രൈബൽ ഗ്രാമത്തിലൂടെ ബംഗ്ലാദേശിലേക്ക് ഒഴുകുന്നു. ദൗകിയിലെത്തുമ്പോൾ ഇതിനെ ദൗകി നദിയെന്നും വിളിക്കുന്നു. കേവലം പതിനഞ്ച് കിലോമീറ്റർ ദൂരം മാത്രമാണ് ഈ നദി ഇന്ത്യയിലൂടെ ഒഴുകുന്നത്. കൊതിപ്പിക്കുന്ന ഉരുളൻ കല്ലുകൾ നിറഞ്ഞ നദിതീരങ്ങൾ. ചില്ലുകുപ്പിയിൽ നിറച്ചു വച്ച വെള്ളത്തിലേക്ക് നോക്കുന്നപോലെ, പളുങ്കു നിറത്തിൽ വെള്ളം. മരതകവർണ്ണമാർന്ന നദിയുടെ അടിത്തട്ട് പോലും മുകളിൽ നിന്ന് നോക്കിയാൽ മനോഹരമായി സജ്ജീകരിച്ച ഒരു അക്വേറിയം പോലെ കാണാൻ സാധിക്കുന്നതിനാലാണ് ഉംഗോട്ടിന് ഗ്ലാസ്‌ റിവർ എന്ന പേര് ലഭിച്ചത്. ഇവിടത്തെ ഉരുളൻകല്ലുകൾക്ക് ബംഗ്ലാദേശിൽ നല്ല മാർക്കറ്റാണ്. ട്രാൻസ്‌പോർട്ടേഷൻ ഏക്സ്‌പെൻസ് ലാഭിക്കുന്നതിന്, കെട്ടിടനിർമ്മാണത്തിനും മറ്റും ത്രിപുരക്കാർപോലും ഈ കല്ലുകൾ ബംഗ്ലാദേശിൽ നിന്നും വാങ്ങുന്നു എന്നു കേട്ടു.

ഒരു വശത്ത് ഇന്ത്യൻ പട്ടാളക്കാരും മറ്റൊരു വശത്ത് ബംഗ്ലാദേശ് പട്ടാളക്കാരും കാവൽ നിൽക്കുന്ന, ഇരുവശത്തും വന്മരങ്ങളും പാറക്കൂട്ടങ്ങളും കോട്ടപോലെ നില്ക്കുന്ന ഉമംഗോട്ട് നദിയിലൂടെയുള്ള സഞ്ചാരം ഒരു സ്വപ്നലോകത്തെന്നപോലെ ഞങ്ങൾ ആവോളം ആസ്വദിച്ചു. ഒരു തരം വല കൊണ്ട് തീർത്ത വേലിയാണ് അതിർത്തി. കല്ലുപാകി ഉയർത്തിയ തിട്ടയുടെ മുകളിൽ ഇന്ത്യൻ പട്ടാള ക്യാമ്പ്. കുറച്ചു പട്ടാളക്കാർ തോക്കും കയ്യിലേന്തി ജാഗരൂഗരായി നിൽക്കുന്നതു കണ്ടു. റാഡ്‌ലിഫ് ലൈൻ എന്ന ഈ അതിർത്തി, ആറ് ബംഗ്ലാദേശി ഡിവിഷനികളിലൂടെയും അഞ്ച് ഇന്ത്യൻ സംസ്ഥാനങ്ങളിലൂടെയും കടന്നുപോകുന്നു.