തൂലികാശ്രീ പുരസ്‌കാരങ്ങൾ

അങ്കണം പുരസ്കാരങ്ങളിൽ 2025ലെ ‘തൂലികാശ്രീ’ അവാർഡുകൾ, പി. കെ. ശ്രീവത്സന്റെ ‘അവൾ ഒരു രൂപകം’, ഡോ. നിർമ്മല നായരുടെ ‘പെറ്റമ്മ’, പുഷ്പൻ ആശാരിക്കുന്നിന്റെ ‘നൂൽപ്പാലം’, എം. മാധവൻകുട്ടി മേനോന്റെ ‘പുനർജ്ജന്മം’ എന്നീ കഥകൾക്കും ജയപ്രകാശ് എറവിന്റെ ‘നഷ്ടഫലം’, സലിം കുളത്തിപ്പടിയുടെ ‘ഒരു മരം ഒരു കാടായിരുന്നു’, എ. പി. നാരായണൻകുട്ടിയുടെ ”അ”മൃത” ഭാഷ്യം’, സുരേഷ് കുമാർ പാർളികാടിന്റെ ‘ക്ളാരാ നീയെവിടെ’, ആർട്ടിസ്റ്റ് സോമൻ അഥീനയുടെ ‘മാതൃരാജ്യം’ എന്നീ കവിതകൾക്കും ലഭിച്ചു.

പി. കെ. ശ്രീവത്സൻ കണ്ണൂർ സ്വദേശിയും ജയപ്രകാശ് എറവ് തൃശ്ശൂർ സ്വദേശിയുമാണ്. 2022ലാണ് തൂലികാശ്രീ പുരസ്‌കാരങ്ങൾ കൊടുത്തു തുടങ്ങിയത്.

പുരസ്‌കാര സമർപ്പണം

എട്ടാമത് സ്മൃതി പുരസ്കാരങ്ങളാണ് വിതരണം ചെയ്തത്. കേരള സാഹിത്യ അക്കാദമിയിൽ നടന്ന ചടങ്ങ്, കേരള സാഹിത്യ അക്കാദമി മുൻ സെക്രട്ടറി പി. വി. കൃഷ്ണൻ നായർ ഉദ്‌ഘാടനം ചെയ്തു. കേരള നിയമസഭ മുൻ സ്പീക്കർ അഡ്വ. തേറമ്പിൽ രാമകൃഷ്ണൻ പുരസ്കാരങ്ങൾ വിതരണം ചെയ്തു. ഷംസുദ്ദീന്റെ പത്നിയും വ്യാസ കോളേജ് മലയാളവിഭാഗം മേധാവിയുമായിരുന്ന എഴുത്തുകാരി ഡോ. പി. സരസ്വതി അദ്ധ്യക്ഷത വഹിച്ചു. സീനിയർ ജേർണലിസ്റ്റ് ഫോറത്തിന്റെ സംസ്ഥാന പ്രസിഡന്റ് അലക്‌സാണ്ടർ സാം ‘ഷംസുദ്ദീൻ അനുസ്മരണം’ നടത്തി. തൃശ്ശിവപേരൂർ മോഹനചന്ദ്രൻ പുരസ്‌കാര ജേതാക്കളെ പരിചയപ്പെടുത്തി. എം. വി. വിനീത, അനിൽ സാമ്രാട്ട്, പി. അപ്പുക്കുട്ടൻ എന്നിവരും അവാർഡ് ജേതാക്കളും സംസാരിച്ചു.

മുതിർന്ന മാധ്യമപ്രവർത്തകൻ എൻ. ശ്രീകുമാർ സ്വാഗതവും പി. എൻ. കൃഷ്ണൻകുട്ടി നന്ദിയും പറഞ്ഞു.

ആര്‍. ഐ. ഷംസുദ്ദീന്‍

തൃശ്ശൂർ വലപ്പാട് രായമരയ്ക്കാര്‍ വീട്ടില്‍ ഇബ്രാഹിമിന്റെയും കുഞ്ഞാമിനയുടെയും മകനായ ആര്‍. ഐ. ഷംസുദ്ദീന്‍ 1982ലാണ് അങ്കണം സാംസ്‌കാരികവേദി രൂപീകരിച്ചത്. 2017 ജൂലൈ 19ന് അദ്ദേഹം ഹൃദയാഘാതത്തെ തുടർന്ന് നിര്യാതനായി. തൃശ്ശൂരിലെ പൂത്തോളിലുള്ള വീട്ടില്‍ വെച്ചായിരുന്നു അന്ത്യം.

അങ്കണത്തിലൂടെ നവാഗതരായ നിരവധി എഴുത്തുകാരെ ഉയർത്തികൊണ്ടുവന്നിട്ടുള്ള ഷംസുദ്ദീന്‍, അവർക്കു വേണ്ടി നിരവധി സാഹിത്യ മത്സരങ്ങളും ക്യാമ്പുകളും സംഘടിപ്പിക്കുകയും അവരുടെ പുസ്തകങ്ങള്‍ പ്രസിദ്ധീകരിക്കുകയും ചെയ്തിരുന്നു.

തൃശ്ശിവപേരൂർ മോഹനചന്ദ്രൻ, അനിൽ സാമ്രാട്ട്, കെ. ആർ. മുരളി, കെ. ആർ. ജോഷി, പി. എൻ. കൃഷ്ണൻകുട്ടി, സന്തോഷ് കുമാർ കെ, പി. എൻ. സഹദേവൻ, ശാന്ത കൃഷ്ണൻകുട്ടി, പ്രേമലത എം. എ. തുടങ്ങിയവരാണ് ഇപ്പോൾ അങ്കണം സാംസ്‌കാരികവേദിയെ നയിക്കുന്നത്.