ഒരു തുള്ളൽ കവിത
പത്തു വരിയിൽ മുത്തുകൾ കോർത്തു
പച്ചമലയാളം വിളമ്പീടേണം.
വാക്കിനാൽ വെറും ജാലം കാട്ടി
വെറുതെയതു കവിതയാക്കീടേണം!
തലക്കനമേറും പദം നിരത്തി ചെമ്മേ
തറവാടിത്തം ചുമ്മാ കാട്ടിടേണം.
വായിക്കുന്നോൻ്റെ നെഞ്ചു നിറയ്ക്കാൻ
വെറുതെ കതിനനിര പൊട്ടിക്കേണം.
കാവ്യഭാഷ്യം പറ്റെ മറന്നീടേണം;
കാലം മാറിയതോർത്തിടേണം.
കാവ്യസത്യം പുറമേ വെച്ചിടേണം;
കാവ്യം നിത്യം പൂക്കണം പാരിൽ!
ചന്തമുള്ളൊരീണത്തിൽ പാടിയാൽ
ചിന്തിക്കാനൊരു നേരം തിരയേണ്ട;
ചന്തയിലിക്കവിത ചന്തത്തിൽ വെച്ചാൽ
ചാളയ്ക്കുമേലെ പോലീച്ചകൾ വന്നിടും!
രാഷ്ട്രദീപിക: 2026 മാർച്ച് 12
പ്രതിഭാവം വാട്സ്ആപ്പ് ഗ്രൂപ്പിലേക്കു സ്വാഗതം🌹
സതീഷ് കളത്തിൽ: തൃശൂർ ശങ്കരയ്യ റോഡ് സ്വദേശി. പ്രതിഭാവം എഡിറ്റർ, ഉത്തരീയം കലാ- സാംസ്കാരിക മാസികയുടെ അസോ. എഡിറ്റർ. ‘ദോഷൈകദൃക്ക്’ എന്ന പേരിൽ പ്രതിഭാവത്തിൽ ‘വോക്കൽ സർക്കസ്’ എഐ കാർട്ടൂൺ കോളവും ചെയ്യുന്നു.
ചലച്ചിത്ര സംവിധായകൻ. മൊബൈൽ ഫോണിൽ ചിത്രീകരിച്ച ഇന്ത്യയിലെ ആദ്യത്തെ ചലച്ചിത്രങ്ങളായ വീണാവാദനം(ചിത്രകലാ ഡോക്യുമെന്ററി), ജലച്ചായം(ഫീച്ചർ ഫിലിം) എന്നിവയും ലാലൂരിന് പറയാനുള്ളത്(പരിസ്ഥിതി ഡോക്യുമെന്ററി), ജ്ഞാനസാരഥി(ഹിസ്റ്ററി ഡോക്യുമെന്ററി) എന്നിവയും ചെയ്തിട്ടുണ്ട്. തൃശ്ശൂർ ആസ്ഥാനമായി പ്രവർത്തിക്കുന്ന ഡിജിറ്റൽ ഫിലിം മേക്കേഴ്സ് ഫോറം ട്രസ്റ്റിന്റെ ചെയർമാനാണ്.
പിതാവ്: ശങ്കരൻ. മാതാവ്: കോമളം(Late). ഭാര്യ: കെ.പി. രമ. മക്കൾ: നിവേദ, നവീൻകൃഷ്ണ, അഖിൽകൃഷ്ണ.
