അതുപോലെ, മാധവിക്കുട്ടി പറഞ്ഞതായുള്ള മറ്റൊരു ഗുരുതരമായ അഭിപ്രായത്തോടുള്ള ഭിന്നതയും ദീപ നിശാന്ത് പങ്കുവെക്കുന്നുണ്ട്.

“ഫുട്ബോൾ ഇതിഹാസം ഐ എം വിജയൻ നായകവേഷത്തിലഭിനയിച്ച ജയരാജിൻ്റെ ‘ശാന്തം’ സിനിമയിറങ്ങിയ സമയത്ത് മാധവിക്കുട്ടിയുടെ ഒരു അഭിമുഖം കണ്ടിട്ടുണ്ട്. അതിലാ സിനിമയെപ്പറ്റി പറയുന്നുണ്ട്.
”ശാന്തം കണ്ടിരുന്നു… ഒരു കറുത്ത കു**ണ്ടനെ എല്ലാവരും കൊണ്ടു നടക്കുന്നു… ഓമനിക്കുന്നു… എനിക്ക് തീരെ ഇഷ്ടായില്ല.” എന്നു മാധവിക്കുട്ടി പറഞ്ഞിരുന്നു എന്നാണ്, ദീപ പറയുന്നത്. തുടർന്ന് അവർ ചോദിക്കുന്നു:
“ഹിപ്പോക്രസിയുടെ ഇത്തരം ‘നിഷ്കളങ്കപ്പേച്ചു’കളെ നമ്മൾ ചിലപ്പോൾ ”അടി!” എന്ന് പറഞ്ഞ് മോഹൻലാൽ സ്റ്റൈലിലങ്ങ് ക്ഷമിച്ചു കളയും. മാധവിക്കുട്ടിയ്ക്കു പകരം മറ്റാരെങ്കിലുമാണ് അത് പറഞ്ഞിരുന്നെങ്കിലോ? ഇന്നത്തെ കാലത്തെ ഒരെഴുത്തുകാരനോ എഴുത്തുകാരിയോ അത്തരമൊരു വാചകം പറഞ്ഞു കഴിഞ്ഞാൽ അത്ര നിഷ്കളങ്കമായി നമുക്കതിനെ കാണാൻ കഴിയുമോ?”

‘എന്നാലുമെനിക്ക് അവരുടെ അപകടകരമായ സത്യസന്ധതയും ധീരതയും കള്ളത്തരങ്ങളും ഇഷ്ടമാണെന്നും സ്ത്രൈണവികാരങ്ങളിൽ പ്രണയദാഹവും ഉൾപ്പെടുന്നുവെന്ന പരമാർത്ഥത്തെ അവരോളം മറയില്ലാതെ മലയാളത്തിൽ മറ്റാരും തുറന്നു കാട്ടിയിട്ടില്ലെന്നും’ ദീപ പറയുന്നു.

“പ്രണയിക്കുന്ന ഓരോ സ്ത്രീയുടെ ഉള്ളിലും രാധയുടെ ആത്മാവാണ് കുടികൊള്ളുന്നത്. ഓരോ പുരുഷനിലും അവർ ശ്രീകൃഷ്ണനെയാണ് തിരയുന്നത്. ഈ കൃഷ്ണദർശനം നിമിത്തമാണ് തങ്ങളുടെ പ്രണയഭാജനങ്ങളെ കാണുന്ന മാത്രയിൽ അനുരാഗികളുടെ പാദചലനങ്ങളുടെ താളം തെറ്റുന്നതും ലജ്ജ നിമിത്തം വാക്കുകൾക്ക് ഇടർച്ച സംഭവിക്കുന്നതും.

രാധയുടെ അശാന്തമായ ആത്മാവ് ഓരോ കാമുകിയിലും ആവേശിക്കുന്നു. അവൾ തൻ്റെ സ്നേഹഭാജനത്തിൽ കൃഷ്ണനെ ദർശിച്ച് അവനിൽ ലയിക്കാൻ മോഹിക്കുന്നു. പക്ഷേ ആ ശ്യാമകൃഷ്ണൻ ഒരിക്കലും പിടി തരില്ല. അതുകൊണ്ടാണ് എത്ര തിരഞ്ഞാലും പ്രണയിനികൾക്ക് അശാന്തി മാത്രം ബാക്കിയാവുന്നത്.

സാഹിത്യത്തിലെ നിത്യകാമുകീത്വത്തിന് എന്നും ഒരേ മുഖച്ഛായയാണ്. മാധവിക്കുട്ടിയുടെ മുഖച്ഛായ!
“നീ മറഞ്ഞാലും തിരയടിക്കും
നീലക്കുയിലേ നിൻ ഗാനമെന്നും…”
എന്ന് തൻ്റെ ഭാവികാലത്തിനു വേണ്ടി പാടി കടന്നു പോയ ചങ്ങമ്പുഴയുടെ വരികൾ മാധവിക്കുട്ടിക്കും ചേരും.

പ്രണയനോവുകൾ പാടിക്കൊണ്ട് ആ നീലക്കുയിൽ പറന്നകന്നിട്ടും ആ ഗാനത്തിൻ്റെ മധുരവീചികൾ കാതിൽ അലയടിച്ചു കൊണ്ടേയിരിക്കുന്നു. ഋതുഭേദമില്ലാത്ത വസന്തസാന്നിധ്യത്തിന് ഭാഷയുള്ള കാലത്തോളം മരണമില്ല.”

സ്നേഹം ഒളിച്ചു വെക്കേണ്ടുന്ന ഒരു വികൃത വികാരമായിരുന്നില്ല മാധവിക്കുട്ടിക്ക്. ഭക്ഷണം പോലെ, വെള്ളം പോലെ, പ്രാണവായു പോലെ തന്നെയായിരുന്നു മാധവിക്കുട്ടിക്ക് പ്രണയവുമെന്ന്, ദീപ നിശാന്ത്.

അതേസമയം, ഐ എം വിജയനെകുറിച്ച് ‘അങ്ങനെ മാധവിക്കുട്ടി പറഞ്ഞുവോ’ എന്ന ചോദ്യം പല കോണുകളിൽ നിന്നും ഉയരുന്നുണ്ട്.