കേരളത്തിലെ സ്‌കൂൾ സീസൺ ഇങ്ങടുത്തെത്തി. സ്‌കൂൾ പ്രവേശനോത്സവം തിങ്കളാഴ്ചയാണ്, ജൂൺ 2ന്. മഴ കോരിചൊരിഞ്ഞുകൊണ്ടിരിക്കുന്നു. കാലവർഷം ശക്തമായതിനാൽ, സ്‌കൂൾ തുറക്കുന്നതു നീട്ടി വെയ്ക്കണമെന്ന ആവശ്യവും ഉയർന്നിട്ടുണ്ട്.

സ്‌കൂൾ തുറപ്പിന്റെ വാർത്താ വിശേഷങ്ങൾ ശ്രദ്ധയിൽപെട്ടപ്പോഴാണ്, മറ്റൊരു കാര്യം ഓർമ്മ വന്നത്. ഏതാനും ആഴ്ച്ചകൾക്കു മുൻപ് ഒരു പരിചയക്കാരന്റെ വിളി. തൃശൂർ നഗരത്തിലെ ഒരു സ്‌കൂളിന്റെ പേര് സംബന്ധിച്ച് ഒരു സംശയം. അതു ദുരീകരിക്കാൻ വിളിച്ചതാണ്. തൃശൂരിൽ തന്നെയുള്ള, ലോകം അറിയപ്പെടുന്ന ഒരു വ്യക്തി പഠിച്ച സ്‌കൂൾ ആണ്. ഒരു ലേഖന ആവശ്യത്തിനാണ്. പക്ഷെ, സ്‌കൂളിന്റെ പേര് കൃത്യമായി അറിയില്ല.

ആളുടെ പേര് കേട്ടതും ഉടനെ ഞാൻ പറഞ്ഞു,
“സി. എം. സ്. സ്‌കൂൾ.”

“അല്ല.” മറുതലയ്ക്കൽനിന്നും ക്ഷണം മറുപടി എത്തി.
“സി. എം. സ്. സ്‌കൂളിൽ അഞ്ചാം ക്ലാസുതൊട്ടാണു പഠിച്ചത്. നാലാം തരംവരെ പഠിച്ചതു മറ്റൊരു സ്‌കൂളിലാണ്.”

അതെനിക്കു പുതിയ അറിവായിരുന്നു. ഇതിനിടെ, നെറ്റിലൊരു ഓട്ടപ്രദക്ഷിണം നടത്തി നോക്കി. സി. എം. സ്. സ്‌കൂൾ അല്ലാതെ മറ്റൊരു സ്‌കൂളിന്റെ പരാമർശം എങ്ങും കാണുന്നില്ല. പക്ഷെ, വിളിച്ച ആൾ തറപ്പിച്ചു പറയുന്നു, മറ്റൊരു സ്‌കൂൾ ഉണ്ടെന്ന്. അദ്ദേഹം ഒരു ലിങ്ക് എനിക്ക് ഇട്ടുതരുന്നു. കുറച്ചു കാലം മുൻപുള്ള ഒരു ചാനൽ അഭിമുഖത്തിന്റെ ലിങ്ക് ആണ്.

ശരിയാണ്, അഭിമുഖത്തിൽ ഈ പ്രസ്തുത പ്രശസ്ത വ്യക്തി പറയുന്നുണ്ട്, അദ്ദേഹം ആദ്യം ചേർന്ന സ്‌കൂളിനെ പറ്റി. പക്ഷെ, വർഷങ്ങൾക്കു മുൻപുള്ള അഭിമുഖമായതിനാലാകും, ആ സ്‌കൂളിന്റെ പേര് പറയുന്ന ഭാഗത്തെ ഉച്ചാരണത്തിന് ഒരു ക്ലാരിറ്റി ഇല്ലായ്മ. അതോ, തൃശ്ശൂർ ഭാഷേടെ കുഴപ്പം കൊണ്ടാകുമോ? ശിർർറ് ന്നങ്ങടു പാഞ്ഞുപോകുകയാണ് ആ പേര്. ‘കുട്ടന്നൂർ സ്‌കൂൾ’ എന്നു പറയുന്നതുപോലെ. ‘ട്ട’ യുടെ ഭാഗത്തായി ഒരു അവ്യക്തത. വിളിച്ച ആളിന് അത്രേം പിടികിട്ടിയില്ല. തെക്കുനിന്നുള്ള ആളാണ്. തൃശൂർ ഭാഷ പെട്ടെന്നു പിടികിട്ടില്ല. അതുകൊണ്ട്, ആ പേര് കൃത്യമായി അറിയാനാണ് എന്നെ വിളിച്ചത്.

തൃശൂർകാരനായിട്ടും, പലവട്ടം ശ്രദ്ധിച്ചിട്ടും അതേ പേര് ആണ് മനസിലാകുന്നത്. ഇനി, ഇങ്ങനെ ഒരു പേരിൽ പണ്ടു വല്ല സ്‌കൂളും ഉണ്ടോന്നറിയാൻ സെർച്ചു ചെയ്തു. തൃശ്ശൂരിനു പുറത്ത്, തെക്കും വടക്കും ചില ജില്ലകളിൽ ആ പേരിൽ ചില സ്ഥലങ്ങൾ ഉണ്ടെന്നു കണ്ടതൊഴികെ ആ പേരിൽ ഒരു സ്‌കൂൾ ഉള്ളതായി കണ്ടില്ല. അന്വേഷിച്ചിട്ടു പറയാമെന്നു പറഞ്ഞു.

അഭിമുഖത്തിലെ അതിഥിയുടെ നമ്പർ കയ്യിലുമുണ്ട്. വിളിച്ചു ചോദിക്കാം എന്നു കരുതി. പിന്നെ, വേണ്ടെന്നു വെച്ചു. ചോദിക്കാതെ കണ്ടെത്തണമെന്നു തോന്നി.

പിറ്റേന്ന്, അതിനുവേണ്ടി ഇറങ്ങി. ‘അധികം അലച്ചിലിന്റെ ആവശ്യമില്ല. കയ്യെത്തും ദൂരത്തുള്ള സ്ഥലങ്ങളിലേ അന്വേഷിക്കേണ്ടൂ’ എന്നാണ് ആദ്യം കരുതിയത്. പക്ഷെ, വിചാരിച്ചത്ര എളുപ്പമായിരുന്നില്ല അത്. ‘കുട്ടന്നൂർ സ്‌കൂൾ’ എന്ന പേര് അന്വേഷിക്കുമ്പോൾ കൈമലർത്തുന്നവർപോലും ലക്ഷ്യം വെയ്ക്കുന്ന ആളാരാണെന്നു കേൾക്കുമ്പോൾ ഉടനെ കൈചൂണ്ടുന്നതും സി. എം. സ്. സ്‌കൂളിലേക്ക്. അദ്ദേഹം ആ സ്‌കൂളിലെ പൂർവ്വ വിദ്യാർത്ഥിയാണെന്നുള്ളത്, വിശ്വപ്രസിദ്ധമായ കാര്യമാണ്.

അങ്ങനെ വലഞ്ഞു നില്ക്കുമ്പോഴാണ്, സുജേഷിനെ ഓർമ്മ വന്നത്. എന്റെ വല്യമ്മയുടെ മകനാണ്. തൃശ്ശൂർ പാലസ് ഗ്രൌണ്ടിനോടു ചേർന്നാണ് അവന്റെ ചായക്കട. എന്റെ ലക്ഷ്യത്തിലുള്ള ഈ വ്യക്തിയും അവനും തമ്മിൽ അടുത്ത ബന്ധമുണ്ട്. കേരളത്തിലെ ഒട്ടുമിക്ക സ്പോർട്സ് താരങ്ങൾക്കും നാടകക്കാർക്കും രാഷ്ട്രീയക്കാർക്കും ഒക്കെ സുജേഷ് സുപരിചിതനാണ്. രാമനിലയം, സംഗീത നാടക അക്കാദമി തുടങ്ങി മറ്റു പല സാംസ്‌കാരിക കേന്ദ്രങ്ങളും അവന്റെ കടയുടെ ചുറ്റുവട്ടത്താണ്. ആ കടയിൽ വന്നു ചായയോ ഒരു സർബത്തോ ഉപ്പു സോഡയോ കഴിക്കാത്ത തൃശ്ശൂരിലെ വിഐപികൾ കുറവാണെന്നു പറയാം.

നേരെ അങ്ങോട്ടു വെച്ചു പിടിച്ചു. പ്രസ്തുത വ്യക്തിയുമായി ബന്ധപ്പെട്ട് അങ്ങനെയൊരു സ്‌കൂളിനെ കുറിച്ച് അവനും വല്യ ധാരണയില്ല. അവനും അറിയാവുന്നത്, സി. എം. സ്. സ്‌കൂൾതന്നെ. ലിങ്കിലെ വീഡിയോ അവനെ കാണിച്ചു. അതു കണ്ടപ്പോൾ അവൻ ആർക്കൊക്കെയോ റിങ് ചെയ്യുന്നതു കണ്ടു. അങ്ങനെ, ഒരു ഹിന്റ് കിട്ടി.

സ്‌കൂളിന്റെ പേര് ‘കുട്ടന്നൂർ’ അല്ല, ‘കുണ്ടന്നൂർ’ എന്നാണ്. സ്‌കൂൾ ഇന്നില്ല. ‘മൂന്നുകുറ്റി’ എന്ന പ്രദേശത്തായിരുന്നു അത്. വടക്കുംനാഥൻ ക്ഷേത്രത്തിൽ നിന്നും ഷൊർണൂർ റോഡിലൂടെ വരുമ്പോൾ, കൗസ്തുഭം മണ്ഡപം കഴിഞ്ഞു വരുന്ന, ഇടത്തോട്ടു പോകുന്ന റോഡാണ്, മൂന്നുകുറ്റിയിലേക്കുള്ള പ്രധാന വഴി. അന്നീ വഴി കുത്തനെയുള്ള ഒരു ഇറക്കമായിരുന്നു. വടക്കേ ബസ് സ്റ്റാന്റ് ഭാഗത്തുകൂടെയും കൗസ്തുഭം ഭാഗത്ത് എത്താം. തിരുവമ്പാടി ക്ഷേത്രത്തിനു മുൻപിലൂടെ പോകുന്ന പൂങ്കുന്നം റെയിൽവേ ഗേറ്റ് വഴിയിലെ ആദ്യത്തെ ഇടത്തോട്ടുള്ള വഴിയിലൂടെയും ഈ സ്‌കൂളിലേക്ക് എത്താം.

സ്‌കൂളിന്റെ ശരിക്കുള്ള പേര് ഹിന്റ് തന്ന ആൾക്ക് ഓർമ്മയില്ല. അക്കാലത്ത് ആ പ്രദേശം വലിയ കുന്നും കുഴിയുമായി കിടന്നിരുന്ന, ആൾപ്പാർപ്പ് അധികം ഇല്ലാത്ത ഒരിടമായിരുന്നു. സ്‌കൂളിലേക്കു കടക്കുന്ന കൗസ്തുഭം ഭാഗത്തെ റോഡിന്റെ അക്കാലത്തെ പേര് ‘കുണ്ടനിടവഴി’ എന്നായിരുന്നു. ‘കുണ്ടനിടവഴിയിലെ സ്‌കൂൾ’ ഒടുവിൽ, ‘കുണ്ടന്നൂർ സ്‌കൂൾ’ എന്നായി. അഭിമുഖത്തിൽ, തൃശ്ശൂർ സ്ലാങ്ങിൽ സ്പീഡിൽ പറഞ്ഞപ്പോൾ, കുണ്ടന്നൂരിലെ ‘ണ്ട’ കുട്ടന്നൂരിലെ ‘ട്ട’ യിലേക്കു വഴുതിമാറിപോയതാണെന്ന് അതോടെ ബോധ്യമായി.