മധുര നൊമ്പരം
നിന്റെ കൈ
എന്റെ കയ്യിലുണ്ടാകണമെന്ന്
എനിക്കു നിർബന്ധമില്ല.
നിന്റെ ഊഷ്മാവിന്റെ ഒരു കണികപോലും
എന്നരികിലുണ്ടാകണമെന്നുമില്ല.
സ്നേഹം അളക്കുന്നത്,
സ്പർശനത്തിലൂടെയോ
സാന്നിധ്യത്തിലൂടെയോ അല്ല;
എവിടെയാണോ നമ്മുടെ സ്വപ്‌നങ്ങൾ സ്വതന്ത്രമാകുന്നത്,
അവിടെ സ്നേഹം ചിറകടിക്കുന്നു.
തൊട്ടറിയാനുള്ള ലജ്ജകൊണ്ട്,
ഒരിക്കൽ നീ അകന്നുപോയാൽ;
നിന്നോടുള്ള അമിതമായ ഇഷ്ടം
എന്റെ ഞരമ്പുകളിലൂടെ പാഞ്ഞ്,
വിരഹത്തിന്റെ
സുഖമുള്ള ഒരു നൊമ്പരത്തിലേക്കു
ഞാൻ പറന്നടുക്കും.
നീ,
ചൂളം വിളിക്കുന്ന കാറ്റിലില്ല.
എന്നിട്ടും,
ഓരോ കാറ്റും നിന്റെ പേര് ചൊല്ലുന്നു.
എന്നരികിലുള്ള കാൽപ്പാടുകളിൽ നീയില്ല.
എന്നിട്ടും,
നീയെപ്പോഴും കൂടെയുള്ളതുപോലെ,
ഞാൻ നടക്കുന്നു.
നിന്റെ ശബ്ദം
കാറ്റിലലിയുകകയാണ്;
ഞാൻ നിന്നെ പിന്തുടരട്ടെന്നോ;
അതോ,
ആ ധ്വനി വെറുതേ ആസ്വദിച്ചാൽ മതിയെന്നോ?
മൂർത്തമായ ഒരു രൂപത്തിൽ നിന്നെ ഞാൻ
തിരയുകയില്ല;
കാരണം, അത് ഇപ്പോഴും എപ്പോഴും;
പ്രകൃതി എനിക്കായി വരച്ചിട്ട,
മായാത്ത ഒരേയൊരു ഛായാചിത്രമായി,
കണ്ണിൽ നില്ക്കുകയാണ്.
പ്രതിഭാവം വാട്സ്ആപ്പ് ഗ്രൂപ്പിലേക്കു സ്വാഗതം🌹
സതീഷ് കളത്തിൽ: തൃശൂർ ശങ്കരയ്യ റോഡ് സ്വദേശി. പ്രതിഭാവം എഡിറ്റർ, ഉത്തരീയം കലാ- സാംസ്കാരിക മാസികയുടെ അസോ. എഡിറ്റർ. ‘ദോഷൈകദൃക്ക്’ എന്ന പേരിൽ പ്രതിഭാവത്തിൽ ‘വോക്കൽ സർക്കസ്’ എഐ കാർട്ടൂൺ കോളവും ചെയ്യുന്നു.
ചലച്ചിത്ര സംവിധായകൻ. മൊബൈൽ ഫോണിൽ ചിത്രീകരിച്ച ഇന്ത്യയിലെ ആദ്യത്തെ ചലച്ചിത്രങ്ങളായ വീണാവാദനം(ചിത്രകലാ ഡോക്യുമെന്ററി), ജലച്ചായം(ഫീച്ചർ ഫിലിം) എന്നിവയും ലാലൂരിന് പറയാനുള്ളത്(പരിസ്ഥിതി ഡോക്യുമെന്ററി), ജ്ഞാനസാരഥി(ഹിസ്റ്ററി ഡോക്യുമെന്ററി) എന്നിവയും ചെയ്തിട്ടുണ്ട്. തൃശ്ശൂർ ആസ്ഥാനമായി പ്രവർത്തിക്കുന്ന ഡിജിറ്റൽ ഫിലിം മേക്കേഴ്സ് ഫോറം ട്രസ്റ്റിന്റെ ചെയർമാനാണ്.
പിതാവ്: ശങ്കരൻ. മാതാവ്: കോമളം(Late). ഭാര്യ: കെ.പി. രമ. മക്കൾ: നിവേദ, നവീൻകൃഷ്ണ, അഖിൽകൃഷ്ണ.
