തണല്‍:
മ
രത്തിന്‍റെ ചുവട്ടിലേ
തണലുള്ളൂ.
അവിടം വിട്ടാല്‍
കത്തുന്ന വെയിലാണ്.
മരം അതിന്‍റെ തണലിനെ
പിടിവിടാതെ
ചേര്‍ത്തു നിര്‍ത്തിയിരിക്കയാണ്.
ആരെങ്കിലുമൊന്നാ
പിടി വിടുവിച്ചു തരൂ.
എനിക്കാ തണലില്‍
വീടുവരെ നടക്കണം.
സ്വാഭാവികം:
അഭിനയിക്കാനൊട്ടുമറിയില്ല
എന്നെല്ലാവരും കരുതും.
എന്നാലോ,
വേണ്ടിടങ്ങളിലൊക്കെ
സന്ദര്‍ഭാനുസരണം
അഭിനയിച്ചു തകര്‍ക്കും.
അതല്ലേ ജീവിതം!
അസ്സല്‍:
കുട്ടിയായിരുന്നപ്പോള്‍
അപരിചിതര്‍ക്കിടയിലെത്തുമ്പോള്‍
പലരും ചോദിക്കുമായിരുന്നു:
നിന്‍റെ അച്ഛനാരാ?
നിന്‍റെ അപ്പനാരാ?
നിന്‍റെ ഉപ്പയാരാ?
നിന്‍റെ തന്തയാരാ?
നിന്‍റെ ബാപ്പയാരാ?
എന്തൊരു ചോദ്യം?
എന്നിപ്പോള്‍ അറിയാം
ഇടയ്ക്കാരോ
ഒറ്റത്തന്തയ്ക്ക് പിറക്കാത്തവനേ
എന്ന് രോഷാകുലനായപ്പോള്‍.
അസ്തിത്വം:
ഞാനുണ്ടായിരുന്നു
എന്നതിനുണ്ടാവില്ല
ഒരു തെളിവും.
ഞാനില്ലായിരുന്നു
എന്നതിനുണ്ടാവാം
നല്ല തെളിച്ചം..
താരാട്ട്
കുഞ്ഞായിരുന്നപ്പോള്‍
അമ്മ കുളിപ്പിച്ചതു പോലെ
അവസാനയാത്രയ്ക്കു മുമ്പ്
കുളിപ്പിച്ചു കിടത്തുന്നു,
താരാട്ടില്ലാതെ.
കണ്ണൂര്‍ ജില്ലയില്‍ കൂത്തുപറമ്പില്‍ താമസം. ഇരുപത് കവിതാസമാഹാരങ്ങള്‍ പ്രസിദ്ധീകൃതമായിട്ടുണ്ട്.
