Published on: July 16, 2025
സ്മൃതിനാശം
എന്നെ പഴി പറഞ്ഞ് സായൂജ്യം കൊള്ളുന്നോർ
നശിച്ച് പോകട്ടെയെന്ന്
ഞാൻ പ്രാർത്ഥിയ്ക്കാറില്ല.
അവർക്ക് നല്ല കാലവും സൽബുദ്ധിയും
തോന്നിക്കേണമെ എന്ന്
ഉള്ളുരുകി പ്രാർത്ഥിയ്ക്കും.
എല്ലാം കഴിയുമ്പോഴാണ്
എനിക്കായ് ബാക്കിവച്ചത്
സ്മൃതിപഥത്തിലെത്തുന്നത്.
ഞാനെത്ര പാപി.
സമയം,
കാലം,
സന്ദർഭം,
തിരക്ക്.
കുറ്റബോധത്തിൻ കനലെരിയും മനസ്സുമായ്
തമോഗർത്തത്തിൽ അകപ്പെട്ടോൻ…
വാക്കുകൾ തൻ
വാസന്ത നീഹാരിക നിശീഥിനിയിലെ
പാർവണയൊളിയിലും
ഒന്നിൽ നിന്നും മോചിതനാകാതെ
ശരി തെറ്റുകളിലിടകലർന്ന്
ആന്ദോളനത്തിമിർപ്പിലങ്ങനെ…
അടിവേരുകളിൽ നിന്നടർന്നുപോയ
ജൈവരേണുക്കളിൽ
ജീവൽതുടിപ്പിൻ അതിജീവനസ്വനം
കേൾപ്പൂ ഞാൻ.
മറവിതൻ തിരസ്ക്കരണിയ്ക്കു
പിന്നിൽ നിന്നാരെയോ
പേർ ചൊല്ലി വിളിക്കുന്നുണ്ട്
ഞാനിപ്പൊഴും.
മറുവിളിയില്ലാതെ
പ്രതിധ്വനിതൻ ശബ്ദവീചികൾ
എൻ്റേതു തന്നെയാവുന്നതും
ഞാനറിയുന്നു…
പ്രതിഭാവം പ്രഥമ ഓണപ്പതിപ്പ് പുസ്തകരൂപത്തിൽ വായിക്കാം
പ്രതിഭാവം വാട്സ്ആപ്പ് ഗ്രൂപ്പിലേക്കു സ്വാഗതം🌹
ജയപ്രകാശ് എറവ്: തൃശ്ശൂർ എറവ് സ്വദേശി. ഒരു സ്വകാര്യ ആയുർവേദ കമ്പനിയുടെ സെയിൽസ് ഓഫീസറായി റിട്ടയർ ചെയ്തു.
‘കണ്ണാടിയിൽ നോക്കുമ്പോൾ’, ‘അമ്മയുടെകണ്ണ്’ എന്നീ കവിതസമാഹാരങ്ങൾ പ്രസിദ്ധീകരിച്ചു.
2025ലെ അങ്കണം ഷംസുദ്ദീൻ സ്മൃതി പുരസ്കാരങ്ങളിൽ ‘തൂലികാ ശ്രീ’ പുരസ്കാരം ലഭിച്ചിട്ടുണ്ട്. ‘നഷ്ടഫലം’ കവിതക്കാണ് അവാർഡ്. ചെറുപ്പം മുതൽ കവിതയെഴുതുന്ന ജയപ്രകാശ്, മാതൃഭൂമിയുടെ ബാലപംക്തിയിലൂടെ കവിതകൾ എഴുതിയാണ് എഴുത്തുവഴിയിലെത്തിയത്.
നിലവിൽ, തൃശ്ശൂർ നെല്ലിക്കുന്ന് കാച്ചേരിയിൽ താമസിക്കുന്നു. ഭാര്യ: വിജയലക്ഷ്മി. എഴുത്തുകാരിയായ അഭിരാമി മകളാണ്.
