നേരത്തെ എഴുന്നേൽക്കാൻ ഒരു താൽപ്പര്യവും ഇല്ലാത്ത കുട്ടികൾ പടക്കം പൊട്ടിക്കാൻ വളരെയേറെ ഉത്സാഹത്തോടെ നേരത്തെ എഴുന്നേൽക്കുന്ന ഒരു ദിനംകൂടി ആണ് വിഷു. വീടും പരിസരവും വൃത്തിയാക്കി പുതുവർഷത്തെ വരവേൽക്കാനൊരുങ്ങുന്ന ഈ ഉത്സവത്തിന്റെ മനോഹരമായ കഴിഞ്ഞകാല ദൃശ്യങ്ങൾ ഇന്നും മനസ്സിൽ ഉണർത്തുന്നു. വിഷുക്കൈനീട്ടം, വിഷുക്കണി, പടക്കം പൊട്ടിക്കൽ, ചക്ക- മാങ്ങ ഉപയോഗിച്ചുള്ള വ്യത്യസ്തങ്ങളായ കറികൾ തുടങ്ങിയവയാണ് മനസ്സിൽ വിരിയുന്ന വിഷു.

വിഷു, പ്രകൃതിയുടെ ഒരു ചാക്രീയമായ തുടക്കമാണ്. ഇതിനോടനുബന്ധിച്ച് പ്രകൃതിയും മനുഷ്യനും കൂടിച്ചേർന്ന് ഭൂമിയെ വീണ്ടും കൃഷിയോഗ്യമാക്കുന്നു. പണ്ട് പ്രകൃതിക്ക് അനുയോജ്യമായ രീതികളാണ് അവലബിച്ചിരുന്നത്. അന്ന്, ഗ്രഹങ്ങളുടെ സ്ഥാനം നോക്കി വിഷുഫലം പറയുമായിരുന്നു. ഈ വിഷുഫലമാണ് മനുഷ്യരിൽ പ്രതീക്ഷയുടെയും പ്രത്യാശയുടെയും വിത്ത് അക്കാലങ്ങളിൽ പാകിയിരുന്നത്. ഇന്ന് ഗ്രഹങ്ങൾ വഴിമാറി. ശാസ്ത്രം ശക്തി നേടി.

ഇന്ന് എല്ലാ ചെടികളെയും ഒട്ടുമിക്ക ജീവജാലങ്ങളേയും ഉൾപരിവർത്തനത്തിന് (mutation) വിധേയമാക്കി, പ്രകൃതിയുടെ സ്വാഭാവിക പരിണാമത്തിന് അനുസൃതമല്ലാതെ വളർത്തിയെടുക്കുന്നു മനുഷ്യർ. എല്ലാത്തിന്റെയും വിളനിലമായ ഭൂമിയെയും വെറുതെ വിടുന്നില്ല. ഇന്ന് ശാസ്ത്രമാണ് വിഷുഫലം നല്കുന്നത്. പ്രതീക്ഷയും പ്രത്യാശയും നൽകുന്നത്. ഈ വളർച്ചയിൽ, ശാസ്ത്രം പക്വമായി, മനസ്സ് അപക്വവും. ഇതൊരു വിരോധാഭാസമായി തോന്നാമെങ്കിലും മണ്ണിൽനിന്നകന്ന മനുഷ്യർ വിളവെടുക്കുന്ന ഈ കാലത്ത് ഇതിൽ കൂടുതൽ പ്രതീക്ഷിക്കേണ്ടതില്ല.

ഇന്ന് വിഷു പ്രതീക്ഷയുടെ പ്രതീകമല്ലാതായിരിക്കുന്നു!