ഒരു വിഷുതലേന്ന്
പള്ളീലമ്പലത്തിലെ ബാലെ കാണാൻ
പോയി താമരക്കുളം
കടന്നു തിരിച്ചു വന്ന കാലം
ഏറ്റം പിന്നിലാണെങ്കിലും
കൺമുന്നിൽ തന്നെ
വന്നു നിൽക്കയല്ലോ;
കണികൊന്നപൂത്ത
മാതിരി.

ഇങ്ങു ചാരത്തുണ്ടൊരോര്‍മ്മ,
പടക്കം, പൊട്ടാസു തോണ്ടി, കല്ലിട്ടിടിച്ച്
കൈവിരൽ ചതഞ്ഞ
ചോര ചുവപ്പിലു –
മുണ്ടായിരുന്നുവോ
ഓർമ്മക്കെണിയിലെ മൂഷികജാലം…

പല മാതിരി
കണ്ടം ചാടി
പായുന്ന മേഘങ്ങളായ്,
നമ്മളെത്ര
രൂപങ്ങള്‍
കൊത്തി കൊത്തി
‘തേഞ്ഞുതീർന്നപ്പോള്‍
വിഷുവങ്ങൾ മാഞ്ഞു സായംകാലമായി
ചുളിഞ്ഞു രൂപം മാറുമ്പോള്‍,
അന്തി ചോപ്പിൽ
തലചായ്ച്ചാ നിലാ-
ക്കള്ളി തെങ്ങോലതൻ
അഴിമാറ്റി
ചെമ്പകതെല്ലിനോട്
കിന്നാരം ചൊല്ലുമ്പോൾ,
വിഷു
ക്രമം തെറ്റുമ്പോൾ,
കോടി പുതച്ച്
കുളിപ്പിച്ചാരോ
കിടത്തുമ്പോള്‍,
പൂത്ത കൊന്നയിൽ
പുഴുവെന്നപോൽ
പിച്ചവച്ച കാലം
മറവി ചവിട്ടി
മായുമ്പോള്‍
ഓർമയിൽ
ഉണ്ടായിരുന്നുവോ കൂട്ടുകാരാ…