ഒബവ്വയുടെ മൃതശരീരത്തോടൊപ്പം രക്തം പുരണ്ടു കിടന്നിരുന്ന മരക്കഷ്ണത്തിൽ നിന്നും ചിന്നി ചിതറികിടക്കുന്ന ശത്രുക്കളുടെ തലകളിൽ നിന്നും ‘ഒബവ്വയുടെ പോരാട്ടത്തിന്റെ കഥ’ അറിഞ്ഞ ആ നാട് ഒബവ്വയെ ധൈര്യത്തിൻ്റെയും ത്യാഗത്തിൻ്റെയും പ്രതീകമായി പ്രതിഷ്ഠിച്ചു. ഒബവ്വ എന്ന പേരിനൊപ്പം ഉലക്ക എന്നർത്ഥമുള്ള ‘ഒനകെ’ എന്ന കന്നട പദവും ലഭിച്ചു. അങ്ങനെയവർ കർണാടകയുടെ ധീരവനിത, ‘ഒനകെ ഒബവ്വയായി’. ഒബവ്വ പൊരുതി നിന്ന ആ രഹസ്യദ്വാരത്തിനു പിന്നീട് ‘ഒനകെ ഒബവ്വ കിണ്ടി(window)’ എന്ന പേര് നല്കുകയും ചെയ്തു.

കർണാടകയെ കീഴടക്കാനെത്തിയ മുഗൾ ചക്രവർത്തി ഔറംഗസീബിനെ നേരിട്ട കേലാടി രാജവംശത്തിലെ റാണി കേലാടി ചെന്നമ്മ, പോർച്ചുഗീസുകാരെ നേരിട്ട അബ്ബക്കാ റാണ, ഇംഗ്ലീഷ് ഈസ്റ്റ് ഇന്ത്യാ കമ്പനിക്കെതിരെ കലാപം നയിച്ച കിത്തൂർ റാണി ചെന്നമ്മ എന്നീ കർണ്ണാടകയുടെ ധീരവനിതകൾക്കൊപ്പംതന്നെ ഒബവ്വയും ഇവിടെ ആദരിക്കപ്പെടുന്നു. നവംബർ 11 കർണ്ണാടകയിൽ ഒബവ്വ ജയന്തി ആഘോഷിക്കുന്നു. നാടിനോട് കാണിച്ച സ്നേഹവും ധൈര്യവും ഒബവ്വയെ അജയ്യയാക്കുന്നു. ആ ചരിത്ര വനിതയുടെ സ്മാരകത്തിന്റെ ഫോട്ടോ എടുക്കാനായില്ല എന്ന സങ്കടം ബാക്കിനിൽക്കുന്നു.