വീട്ടുപരിസരത്തെ ഏക മാവ്
വീട്ടു പരിസരത്തെ ആ എകമാവ്
വീടിനെ സദാ സശ്രദ്ധം നോക്കി നിന്നു.
കരിയിലകള്‍ പൊഴിച്ച്
സാന്നിധ്യം അറിയിച്ചുകൊണ്ടിരുന്നു.
വീട്ടുകാരെയെന്തോ
ഓർമ്മപ്പെടുത്തി ഓർമ്മപ്പെടുത്തി
ശ്രദ്ധ ക്ഷണിച്ചുകൊണ്ടിരുന്നു.
പതിവായി
ചൂലേന്തിയെത്തിയിരുന്ന ഒരു
നൃത്തച്ചുവടിനെ പ്രണയിച്ചു;
വൃത്തിയുള്ള
ഇടങ്ങളിലൊക്കെ നിഴലുവിരിച്ച്
ഇലകള്‍കൊണ്ടവ
രേഖപ്പെടുത്തി വച്ചു…
ആ ഉത്സാഹത്തില്‍
പൂത്തു.
കായ്ച്ചു.
വസന്തങ്ങളെ വരവേറ്റു.
മധുരം വിതറി
ആനന്ദം പങ്കുവച്ചു.
മുറ്റത്തു കരിയിലകള്‍
കുമിഞ്ഞുകൂടുന്ന
ആ ദിനരാത്രങ്ങളില്‍ മാത്രം
അതു വല്ലാതെ അലോസരപ്പെട്ടു.
ഒരുനാള്‍
ധിറുതിയിലെത്തിയ
കുറേ അപരിചിത ചുവടുവയ്പുകൾ
മുറ്റം വെടിപ്പാക്കുന്നതും
നിഗൂഢഭാവത്തിൽ തന്നെ വീക്ഷിക്കുന്നതും
മരം
ഒരാന്തലോടെ നോക്കി നിന്നു.
കാറ്റത്തിളകാതെ,
കരിയിലകള്‍ പൊഴിക്കാതെ
നെടുവീര്‍പ്പോടെയാ
ദിനരാത്രമുന്തിനീക്കി.
ഒരിലയ്ക്കും
പൊഴിഞ്ഞുവീഴാനിടമില്ലാത്തവിധം
മുറ്റവും വീടും സജീവമാകുന്നതു
കണ്ടു നിന്നു.
അന്നാദ്യമായി വീട്
മാവിനെ
അടിമുടിയൊന്നു നോക്കി.
ഇലകളില്‍ നിന്നും തണലുകള്‍
ഒന്നൊഴിയാതെ കൊഴിഞ്ഞു പോകുന്നതായ്
മരത്തിനു തോന്നി.
വീട്ടു പരിസരത്തെ ആ
ഏക മാവ്
വീടിനെ അവസാനമായ്
ഒന്നുകൂടി നോക്കി.
മൂർച്ചയുള്ളൊരു നോവ്
കടയ്ക്കൽ വന്നു മുറിയുന്നതറിഞ്ഞു.
വീടിന്റെ തെക്കേ മൂലയിലേയ്ക്കതു ചാഞ്ഞു.
തണലു കടയാന്‍
അതുവരെമോന്തിയ
മുഴുവന്‍ വെയിലുകളെയും
കടഞ്ഞു കടഞ്ഞു കാട്ടി.
ആലിംഗന ബദ്ധരായ
ഇരുരൂപങ്ങളെ വാർത്തെടുത്ത്
നിവര്‍ത്തിക്കൊണ്ടിരുന്നു…
നൃത്തച്ചുവടുകളോടെ
അനന്തതയിലേയ്ക്കവ
പറന്നുയരുന്നതിനെ
വിവരിക്കാനാകാത്തൊരു വികാരത്തിൽ
വീട് പ്രകടമാക്കിക്കൊണ്ടിരുന്നു.
പ്രതിഭാവം വാട്സ്ആപ്പ് ഗ്രൂപ്പിലേക്കു സ്വാഗതം🌹
തിരുവനന്തപുരം നെടുമങ്ങാട്, താന്നിമൂട് സ്വദ്വേശിയാണ് അസീം താന്നിമൂട്. തിരുവനന്തപുരം ജില്ലാ റൂറൽപ്രസ് ക്ലബ് സെക്രട്ടറിയായിരുന്നു. നിലവിൽ, ദേശാഭിമാനി പത്രത്തിന്റെ തിരുവനന്തപുരം ബ്യൂറോ ലേഖകനാണ്. താന്നിമൂടിന്റെ കവിതകൾ, കേന്ദ്ര സാഹിത്യ അക്കാദമിയുടെ 1980-2010ലെ ‘Anthology of poems in Malayalam’ ഗ്രന്ഥത്തിലും 21st Century Malayalam Poetry Supplementary Special Section-നിലും പോണ്ടിച്ചേരി സര്‍വകലാശാല, കേരള സര്‍വകലാശാല, കണ്ണൂര്‍ യൂണിവേഴ്സിറ്റി സിലബസുകളിലും ഉള്‍പ്പെടുത്തിയിട്ടുണ്ട്. 2021ലെ കൃത്യ ഇന്റർ നാഷണൽ പൊയട്രി ഫെസ്റ്റിവെലിൽ മലയാള കവിതയെ പ്രതിനിധീകരിച്ചു പങ്കെടുക്കുകയുണ്ടായി.
‘കാണാതായ വാക്കുകള്‍’, ‘മരത്തിനെ തിരിച്ചു വിളിക്കുന്ന വിത്ത്’, ‘അന്നു കണ്ട കിളിയുടെ മട്ട്’ എന്നീ കവിതാ സമാഹാരങ്ങളും ‘മിണ്ടിയും മിണ്ടാതെയും’ എന്ന ലേഖന സമാഹാരവും പ്രസിദ്ധീകരിച്ചിട്ടുണ്ട്. മരത്തിനെ തിരിച്ചു വിളിക്കുന്ന വിത്തിന്, ‘മൂലൂര്‍ സ്മാരക പുരസ്കാരം’, ‘അബുദാബി ശക്തി അവാർഡ്’, ‘ഡോ.നെല്ലിക്കല്‍ മുരളീധരന്‍ സ്മാരക അവാര്‍ഡ്’, ‘പൂര്‍ണ്ണ ആര്‍ രാമചന്ദ്രന്‍ അവാര്‍ഡ്’, ‘ഉള്ളൂര്‍ സ്മാരക സാഹിത്യ പുരസ്കാരം’ എന്നീ പുരസ്കാരങ്ങളും അന്നു കണ്ട കിളിയുടെ മട്ടിന്, ‘ചാത്തന്നൂ മോഹന്‍ സ്മാരക പുരസ്കാരം’, ‘ബി സി വി സ്മാരരക കാവ്യ പുരസ്കാരം’ എന്നീ പുരസ്കാരങ്ങളും കാണാതായ വാക്കുകള്‍ക്ക്, ‘വൈലോപ്പിള്ളി പുരസ്കാരം’, ‘വി ടി കുമാരന്‍ മാസ്റ്റര്‍ പുരസ്കാരം’, ‘വൈക്കം മുഹമ്മദ് ബഷീര്‍ സ്മാരക പുരസ്കാരം’, ‘തിരുനെല്ലൂര്‍ കരുണാകരന്‍ പുരസ്കാരം’, ‘മൂടാടി ദാമോദരന്‍ സ്മാരക പുരസ്കാരം’, ‘അനിയാവ സാഹിത്യ പുരസ്കാരം’, ‘യുവ സാഹിത്യ പുരസ്കാരം’, ‘കന്യാകുമാരി മലയാള സമാജം പുരസ്കാരം’ എന്നീ പുരസ്കാരങ്ങളും ലഭിച്ചിട്ടുണ്ട്.
