ഫാദേഴ്സ് ഡേ
മഴ വരുമോ?
വന്നാൽ നനയുമോ?
ഒപ്പം നീയുണ്ടാകുമോ?
വ്രതം കഴിഞ്ഞു
കോടിയുടുത്തു
തുമ്പികൾ പാറിപ്പറന്നു.
യുദ്ധഭൂമിയിൽനിന്ന്
മകൻ വിളിക്കുന്നു,
ഇവിടെ നല്ല മഴ.
എന്നിട്ടും ആകാശത്ത്
പടക്കം പൊട്ടുന്നു.
തോരാ മഴയിത്.
ആര് തോൽക്കും
ഈ യുദ്ധത്തിൽ?
ഇവിടെ മഴയില്ല.
മഴപെയ്യുമെന്നറിയില്ല.
തോൽക്കാനാരുമില്ല.
തോറ്റിടം നനയുവാനും.
അണ്ണാൻകുഞ്ഞും വന്നില്ല.
തൊടിയിലും മരത്തിലും നോക്കി.
അതും മഴ തേടിപ്പോയോ?
എവിടെയോ മഴ പെയ്യുന്നു.
ആരോ മഴ നനയുന്നു.
ഞാൻ പുറത്തേക്കുതന്നെ നോക്കി.
ഒരു കുട നടന്നുവരുന്നു.
ഇന്ന് ഫാദേഴ്സ് ഡേ ആണത്രേ!
Join with us
സുറാബ്: ‘വടക്കൻ മലബാറിലെ മുസ്ലിം ജീവിതം പരിചയപ്പെടുത്തിയ കഥാകാരൻ’ എന്നറിയപ്പെടുന്ന, കാസർകോട് നീലേശ്വരം സ്വദേശി സുറാബിന്റെ യഥാർത്ഥ പേര് അബൂബക്കർ അഹമ്മദ് എന്നാണ്. കയ്യൂർ സമരത്തിന്റെ ചരിത്രം പറയുന്ന ‘അരയാക്കടവിൽ’ എന്ന മലയാളസിനിമയിലെ ‘കയ്യൂരിൽ ഉള്ളോർക്ക്’ എന്ന ഗാനത്തിന്റെ രചയിതാവായ സുറാബ് നോവൽ, കഥ, കവിത തുടങ്ങിയ വിഭാഗങ്ങളിലായി അമ്പതിലേറെ പുസ്തകങ്ങൾ രചിട്ടുണ്ട്. കുടുംബസമേതം ഏറെക്കാലം ഷാർജയിൽ ആയിരുന്നു. ഇപ്പോൾ, ബേക്കൽ കോട്ടയ്ക്കടുത്തുള്ള ബേക്കൽ കുന്നിൽ താമസിക്കുന്നു.
