വളഞ്ഞിട്ടാക്രമിക്കുകയാണെന്നോ
കാർന്നുതിന്നുകയാണെന്നോ
ആലങ്കാരികമായി പറയും
മനുഷ്യരിൽ നിക്ഷിപ്തമായ
ഹിംസയുടെ
സകല ശൈലീവിശേഷങ്ങളാലും .

എനിയ്ക്കതിലുണ്ടോ പരിഭവമോ
വേദനയോ
പരാതിയോ എന്നോർക്കാതെ.

ഞങ്ങൾക്കില്ലല്ലോ
തീയതും നല്ലതും വേറിട്ട തിരിവുകൾ,
വിദ്വേഷത്തിന്റെ വെട്ടിയകറ്റലും.

ഉണ്ട്
ഒരു മരച്ചില്ല;
മറ്റൊരുയിർപ്പച്ചയ്ക്ക് അഭയമാകുന്നതിന്റെ
നേരുകൾ.

വർഷാവർഷം പൂത്തുലഞ്ഞ്
കായ്ച്ചു നിന്ന മാവ്
ഇത്തവണ
പച്ചിലപ്പൂക്കാവടി ചൂടി
ഉലഞ്ഞാടി,
ഇത്തിൾക്കണ്ണിച്ചിരിയോടെ
അടക്കം പറഞ്ഞത്,
തണലു തെരഞ്ഞ് ചെന്ന ഒരു നട്ടുച്ചയ്ക്ക്!