ചലച്ചിത്രയാത്രയുടെ ഒരു ഘട്ടത്തിൽ, പ്രേം നസീർ, സത്യൻ തുടങ്ങിയ പുത്തൻ തലമുറയ്ക്ക് തന്റെ സൂപ്പർ ഹീറോ പരിവേഷം ഒഴിഞ്ഞു കൊടുത്ത് കാരക്ടർ റോളുകളിലേക്കും പിന്നീട്, അമ്മാവന്‍- മുത്തച്ഛന്‍ തുടങ്ങിയ വേഷങ്ങളിലേക്കും കൂടുമാറിയെങ്കിലും തന്റെ അവസാനത്തെ അഭിനയ മുഹൂർത്തവും തീരുന്നതുവരെ ആ നടനഭൈഭവം കൂടുതൽ ആളി നില്കുന്ന കാഴ്ചയാണ് മലയാള സിനിമാ ലോകം കണ്ടത്. 1997 സെപ്തംബറിൽ പുറത്തിറങ്ങിയ ജനാധിപത്യത്തിലാണ് തിക്കുറിശ്ശി അവസാനമായി അഭിനയിച്ചത്.

1916 ഒക്ടോബർ 16ന്, അന്ന് കേരളത്തിന്റെ ഭാഗമായിരുന്ന കന്യാകുമാരി ജില്ലയിലെ നാഗർകോവിലിലെ നഞ്ചിൽനാട്ടിലുള്ള തിക്കുറിശ്ശി എന്ന ഗ്രാമത്തിൽ, മങ്ങാട്ട് വീട്ടിലെ എൻ. ലക്ഷ്മി അമ്മയുടെയും എം. സി. ഗോവിന്ദ പിള്ളയുടെയും മകനായി സുകുമാരന്‍ എന്ന തിക്കുറിശ്ശി സുകുമാരന്‍ നായർ ജനിച്ചു. ഇന്ന് തമിഴ്‌നാടിന്റെ ഭാഗമാണ് തിക്കുറിശ്ശി ഗ്രാമം.

കന്യാകുമാരിയിലെ മാർത്താണ്ഡം ഗവ. ബോയ്‌സ് സ്‌കൂളിൽ എട്ടാം ക്ലാസ് വിദ്യാർത്ഥിയായിരിക്കെ, തന്റെ ആദ്യ കവിതയിലൂടെ സാഹിത്യരംഗത്ത് പ്രവേശിച്ച സുകുമാരന്‍ ഇരുപതാം വയസ്സിൽ ‘കെടാവിളക്ക്’ എന്ന തന്റെ ആദ്യ കവിതാസമാഹാരം പുറത്തിറക്കി. തുടർന്നുള്ള സുകുമാരന്‍ എന്ന തിക്കുറിശ്ശിയുടെ യൗവന കാലം നാടകത്തിന്റെ മേച്ചിൽപുറങ്ങളിലൂടെ ആയിരുന്നു. പില്ക്കാലത്ത്, തിക്കുറിശ്ശിക്കവിതകൾ, ഇനി ഈ കണ്ണീർ മാത്രം തുടങ്ങിയ കവിതാസമാഹാരങ്ങളും പുറത്തിറക്കിയിട്ടുണ്ട്.

സംഗീതത്തിന് അമിതപ്രാധാന്യം നല്‍കിയിരുന്ന നാടകങ്ങൾ മാത്രം കണ്ടുശീലിച്ചിരുന്ന മലയാള നാടകരംഗത്തേക്ക് സാമൂഹികപ്രസക്തിയും സംഭാഷണ കേന്ദ്രീകൃതവുമായ റിയലിസ്റ്റിക് നാടകങ്ങളിലൂടെയാണ് തിക്കുറിശ്ശി സുകുമാരന്‍ നായർ കലാ രംഗത്ത് കാലുറപ്പിക്കുന്നത്. കേരളത്തിന്റെ നാടക ലോകത്തിന് തിക്കുറിശ്ശിയുടെ വരവ് ഒരു പുതുയുഗത്തിന്റെ തുടക്കം കുറിയ്ക്കൽ കൂടിയായിരുന്നു.

നാടകത്തിൽ പല മാറ്റങ്ങളും അദ്ദേഹം പരീക്ഷിച്ചു. ഏറെ വിവാദങ്ങൾ നേരിടേണ്ടി വന്ന ‘സ്ത്രീ’ യെ അവതരിപ്പിച്ചപ്പോൾ, നാടക വേദിയുടെ മുൻനിരയിൽ നിന്ന് ഗായകരെ പിന്നണിയിലേക്ക് മാറ്റി. ഇതിവൃത്തങ്ങളിൽ നിന്നും തമിഴിന്റെ അതിപ്രസരണത്തെ ഒഴിവാക്കി, മലയാളിത്തമുള്ള ഇതിവൃത്തങ്ങളെ അവലംബിക്കാൻ ആരംഭിച്ചു.

സ്ത്രീയ്ക്കു പുറമെ, മരീചിക, കലാകരൻ എന്നീ നാടകങ്ങളും വൻ വിജയമായിരുന്നു. തുടർന്ന്, മായ, ശരിയോ തെറ്റോ (1953), പൂജാപുഷ്പം (1969), നഴ്സ് (1969), സരസ്വതി (1970), പളുങ്ക് പാത്രം (1970), അച്ഛന്റെ ഭാര്യ (1971), ഉർവ്വശി ഭാരതി (1973), കുസൃതിക്കുട്ടൻ (1966), പൂച്ചക്കണ്ണി (1966), മുതലാളി (1965), ചിലമ്പൊലി (1963) തുടങ്ങിയ നാടകങ്ങളിലൂടെ മലയാളത്തിലെ പ്രൊഫഷണൽ നാടക രംഗത്ത് ഒരു വിപ്ലവം തന്നെ സൃഷ്ടിച്ചു.

സ്വതവേ സരസനും ഫലിതപ്രിയനുമായിരുന്ന തിക്കുറിശ്ശിയ്ക്ക് കലാ ലോകത്ത് ഒരു കാരണവരുടെ സ്ഥാനമാണ് ഉണ്ടായിരുന്നത്. മലയാളത്തിലെ പ്രശസ്തരും അപ്രശസ്തരുമായ നിരവധി താരങ്ങൾക്ക് സിനിമയ്ക്ക് അനുയോജ്യമായ പേരുകൾ നല്കിയത് തിക്കുറിശ്ശിയാണ്. അബ്ദുൾ ഖാദർ എന്ന പേര് പ്രേം നസീർ എന്നാക്കി നിത്യഹരിത നായകനെ ജനമനസിലേക്ക് കുടിവെച്ചത് തിക്കുറിശ്ശിയാണ്. അതുപോലെ, മാധവൻ നായരെ മധു എന്നും കെ. ബേബി ജോസഫിനെ ജോസ് പ്രകാശ് എന്നും കുഞ്ഞാലിയെ ബഹദൂർ എന്നും പത്മദളാക്ഷനെ കുതിരവട്ടം പപ്പു എന്നും സിനിമയ്ക്കു വേണ്ടി പേര് മാറ്റിയിട്ടുണ്ട് അദ്ദേഹം.