തെന്നിന്ത്യൻ ചലച്ചിത്ര നടിയും ടെലിവിഷൻ അവതാരകയുമായ സ്വാതി റെഡ്ഡിയ്ക്കു നേരെ വ്യാപകമായ സൈബർ ബുള്ളിയിംഗ്.

2014-ൽ നടന്നു എന്നു പറയപ്പെടുന്ന ഒരു അഭിമുഖത്തിൽ സ്വാതി പറഞ്ഞ വാക്കുകളാണ് ഇപ്പോൾ സോഷ്യൽ മീഡിയ അധിക്ഷേപത്തിന് കാരണമായി മാറിയിരിക്കുന്നത്. ‘വിവാഹം കഴിക്കുന്നതിനേക്കാൾ ഭേദം ഒരു നായയെ വളർത്തുന്നതാണ്’ എന്ന്, ആ അഭിമുഖത്തിൽ സ്വാതി പറഞ്ഞു എന്നാണ് ആരോപണം.

അഭിമുഖം നടക്കുന്ന സമയത്ത് താരം അവിവാഹിതയായിരുന്നു. നാല് വർഷങ്ങൾക്കു ശേഷം, 2018ൽ, കൊച്ചിയിലെ, മലേഷ്യന്‍ എയര്‍ലൈന്‍സിലെ പൈലറ്റ് വികാസ് വാസുവിനെ വിവാഹം കഴിച്ചു. പിന്നീട്, മൂന്നാല് വർഷങ്ങൾക്കു ശേഷം, ഇവർ തമ്മിൽ വിവാഹ മോചനം നടക്കാൻ പോകുന്നു എന്ന അഭ്യൂഹങ്ങളും പരന്നു. മൂന്നുവർഷങ്ങൾക്കു മുൻപ്, തന്റെ സമൂ​ഹമാധ്യമ പേജുകളിൽ നിന്നും വികാസിനൊപ്പമുള്ള ചിത്രങ്ങൾ സ്വാതി നീക്കം ചെയ്തിരുന്നതായി റിപ്പോർട്ടുകൾ പുറത്തുവന്നിരുന്നു. അതിനു പിന്നാലെയാണ് താരം വിവാഹ മോചനം തേടുന്നു എന്ന അഭ്യൂഹങ്ങൾ ഉയർന്നത്. ഈ അഭ്യൂഹങ്ങളെ സ്വാതി നിഷേധിച്ചിട്ടുള്ളതാണ്. ഇതുവരെയും വിവാഹമോചനം നടന്നതായുള്ള സ്ഥിരീകരിച്ച റിപ്പോർട്ടുകൾ പുറത്തു വന്നിട്ടുമില്ല.

അതിനിടയിലാണ്, ഇങ്ങനെയൊരു ക്വാട്ട് സോഷ്യൽ മീഡിയയിൽ വ്യാപകമായി പരക്കുന്നത്. സോഷ്യൽ മീഡിയയ്ക്കു പുറമെ, മലയാളം ഉൾപ്പെടെയുള്ള തെന്നിന്ത്യൻ മുഖ്യധാരാ മാധ്യമങ്ങളും സ്വാതിയുടെ ഈ വാക്കുകളെ വെള്ളം തൊടാതെ വിഴുങ്ങി കൊണ്ടിരിക്കുകയാണ്. ഇതിനെ തുടർന്ന്, വൃത്തികെട്ട രീതിയിൽ നിരവധി അധിക്ഷേപങ്ങളും സ്വാതിക്കു നേരെ ഉയർന്നു വന്നിട്ടുണ്ട്.

2014ൽ നടന്നുവെന്ന് പറയപ്പെടുന്ന അഭിമുഖത്തിൽ, വിവാഹകാര്യത്തെ കുറിച്ചുള്ള ഒരു ചോദ്യത്തിന്,
‘ഇന്നത്തെ കാലത്ത് ഒരു വിവാഹബന്ധം വിജയകരമായി മുന്നോട്ട് കൊണ്ടുപോകുക എന്നത് വളരെ ബുദ്ധിമുട്ടുള്ള കാര്യമാണ്. പരസ്പരം മനസ്സിലാക്കാനോ ക്ഷമിക്കാനോ ആർക്കും സമയമില്ല. അതുകൊണ്ട്, അങ്ങനെയൊരു ബന്ധത്തിലേക്ക് കടന്ന് എല്ലാ ദിവസവും മാനസിക സമാധാനം കളയുന്നതിനേക്കാൾ നൂറുമടങ്ങ് നല്ലത് ഒരു നായയെ വളർത്തുന്നതാണ്. ഒരു നായയെ വളർത്തിയാൽ അത് നമ്മളോട് എപ്പോഴും വിശ്വസ്തത പുലർത്തും, യാതൊരു നിബന്ധനകളുമില്ലാതെ നമ്മളെ സ്നേഹിക്കുകയും ചെയ്യും.’ എന്ന മറുപടിയായിരുന്നു താരം നല്കിയത്.

ഇതിനെ വളച്ചൊടിച്ചാണ് ഇപ്പോൾ അവർക്കു നേരെ ഇത്തരത്തിലുള്ള സൈബർ ബുള്ളിയിംഗ്. ഇത്തരം ഒരു അഭിപ്രായപ്രകടനത്തിനു ശേഷം താരം വിവാഹം കഴിച്ചതും ഇപ്പോൾ വിവാഹമോചനത്തിന് ഒരുങ്ങുന്നു എന്നുള്ളതും ആകാം താരത്തിനു നേരെയുള്ള ഈ സൈബർ ബുള്ളിയിംഗിനു കാരണം.

എന്നാൽ, 2014-ൽ  ഇങ്ങനെയൊരു അഭിമുഖം നടന്നു എന്നതിന് വ്യക്തമായ ഒരു തെളിവും നിലവിൽ ലഭ്യമല്ല. പക്ഷെ, പ്രമുഖ തെലുങ്ക് ദിനപത്രമായ ആന്ധ്ര ജ്യോതിയുടെ സിനിമാ പോർട്ടലായ ചിത്രജ്യോതിയിൽ ഉൾപ്പെടെ 2014-ൽ നടന്ന ഒരു അഭിമുഖത്തിൽ സ്വാതി ഇങ്ങനെയൊരു അഭിപ്രായം പറഞ്ഞു എന്ന് റിപ്പോർട്ട് ചെയ്തിട്ടുണ്ട്.