ഒ​രു കൂട്ടുകുടുംബംപോലെ
പഞ്ചായത്തുകിണർ

കുംഭച്ചൂടിൽ
നാടെങ്ങും വേനൽവറുതി
പഞ്ചായത്തു കിണർ
എല്ലാവർക്കും ഇഷ്ടം മാതിരി
വെള്ളം കൊടുത്തു
പത്ത് പടികൾ ചവിട്ടിക്കയറി
തൊട്ടിയും കയറും കപ്പിയിലിട്ട്
ഞങ്ങൻ വെള്ളം കോരി
ഗ്രാമം മുഴുവൻ
ഉറുമ്പുകളെപ്പോലെ
വരിവരിയായി
വെള്ളമെടുക്കാൻ വന്നു

​വീടുകളിൽ
കുഴൽക്കിണർ വന്നതോടെ
ഓരോ വീടും
ഒറ്റപ്പെട്ട ദ്വീപായി
പഞ്ചായത്തുകിണർ
കാലഹരണപ്പെട്ട
തറവാടുപോലായി

​ഒരുനാൾ നിനച്ചിരിക്കാതെ
ഗ്രാമത്തിലൊരു ജാതിവഴക്ക്
വഴക്കിനിടയിലാരോ
കിണറ്റിൽ നഞ്ചു കലക്കി
കിണറിപ്പോൾ
കടത്തിണ്ണയിലെ ഭ്രാന്തിയെപ്പോലെ
ആരാലും നോക്കാതെ
കൂനിക്കൂടിയിരിക്കുന്നു