1892ൽ പുറത്തിറങ്ങിയ, മലയാളത്തിലെ ആദ്യത്തെ ആക്ഷേപഹാസ്യ നോവൽ എന്നറിയപ്പെടുന്ന, കിഴക്കേപ്പാട്ടു രാമൻ കുട്ടി മേനോന്റെ ‘പറങ്ങോടീപരിണയം’ എന്ന കൃതിയെ ഉദാഹണമാക്കി, ‘മലയാളസാഹിത്യത്തിന്റെ മുഖമായി ഇനി നമുക്ക് ‘പറങ്ങോടീപരിണയം’ വെയ്ക്കാം. ഇന്ത്യയില്‍ ഇന്ന് മലയാളസാഹിത്യത്തെ പ്രതിനിധാനം ചെയ്യുന്ന യുവമുഖം ഒരു പള്‍പ്പ് ഫിക്ഷനാണ് എന്നത് അത്ഭുതപ്പെടുത്തുന്നേയില്ല. ലിറ്റററിഫിക്ഷനല്ല, ധാരാളം വിറ്റുപോകുന്ന പള്‍പ്പ് ഫിക്ഷനാണ് ആവശ്യം. മുത്തുച്ചിപ്പിയില്‍ പ്രസിദ്ധീകരിക്കുന്ന ഏതെങ്കിലും ഒരു വ്യക്തിക്ക് മുഖ്യ അവാര്‍ഡ് കൊടുക്കുന്നതും ഇനി പ്രതീക്ഷിക്കണം’ തുടങ്ങിയ ആക്ഷേപങ്ങൾക്കൊപ്പമാണ്, എ. ജി. ഒലീന ഉൾപ്പെടെയുള്ളവരെ അറിയില്ലെന്ന വിവാദ പരാമർശവും നടത്തിയിയത്.

മത്സരത്തിന്റെ ഷോർട്ട് ലിസ്റ്റിൽ ഏഴാം സ്ഥാനത്തുള്ള ജിൻഷ ഗംഗയുടെ ‘ഒട’ (ചെറുകഥാ സമാഹാരം) യും പത്താം സ്ഥാനത്തുള്ള വി. എം. മൃദുലിൻ്റെ ‘കുളെ’ (ചെറുകഥാ സമാഹാരം) യുമാണ് അവാർഡിനു കൂടുതൽ യോഗ്യമെന്ന വാദങ്ങളും പോസ്റ്റിലെ ചർച്ചകളിൽ ഉയരുന്നുണ്ട്.

എന്നാൽ, “നിങ്ങൾ എല്ലാവരും കൂടി ഒരു യുവാവിനെ ഇങ്ങനെ വളഞ്ഞിട്ട് ആക്രമിക്കരുത്. പൾപ്പിനും വേണ്ടേ അവാർഡ്. ഇങ്ങനെ ലിറ്റററി ഫിക്ഷൻ എന്നും പറഞ്ഞു മസിലു പിടിച്ച സാധനങ്ങൾക്ക് മാത്രം അവാർഡ് മതിയോ? പുലിമുരുകനും കാണിക്കട്ടെ കാൻ ഫെസ്റ്റിവലിൽ. ജിൻഷയും മൃദുലും ആദിയും ദുർഗാപ്രസാദും ഇതൊന്നും കണ്ടു സങ്കടപ്പെടരുത്.” എന്നാണ് മറ്റൊരാൾ കുറിച്ചത്.

അതേസമയം, നെഗറ്റിവിറ്റിയില്‍ നിന്നു മാറി നില്‍ക്കുകയാണെന്നും ഇന്ദുമേനോന്റെ വിമര്‍ശനത്തിൽ ദുഖമുണ്ടെന്നും തന്‍റെ സന്തോഷം തന്‍റെ വായനക്കാരിലാണെന്നും മനോരമ ന്യൂസിനു നല്കിയ പ്രതികരണത്തിൽ അഖില്‍ പി ധര്‍മ്മജൻ പറഞ്ഞു.

സിനിമ പഠിക്കാന്‍ ആലപ്പുഴയിലെ ഒരു തീരദേശഗ്രാമത്തിൽ നിന്നും ചെന്നൈയിലെത്തിയ ശ്രീറാം എന്ന യുവാവും ആനന്ദി എന്ന ശ്രീലങ്കന്‍ യുവതിയും കണ്ടുമുട്ടുന്നതാണ്, റാം കെയര്‍ ഓഫ് ആനന്ദിയുടെ കഥ. പ്രണയവും പ്രതികാരവും ഇഴചേർന്ന ഈ നോവല്‍ സമീപകാലത്ത് ഏറ്റവുമധികം വിറ്റഴിക്കപ്പെട്ട നോവലാണ്. ഏകദേശം നാല് ലക്ഷത്തിൽ പരം കോപ്പികളാണ് ഇതിനോടകം വിറ്റുപ്പോയത്.

2018ലെ കേരള പ്രളയത്തെ ആസ്പദമാക്കി, ജൂഡ് അന്താണി ജോസഫിന്റെ സംവിധാനത്തിൽ 2023ൽ പുറത്തിറങ്ങിയ, ‘2018: എവരിവൺ ഇസ് എ ഹീറോ’ എന്ന മലയാള ചലച്ചിത്രത്തിന്റെ കഥ- തിരക്കഥ ജൂഡ് അന്താണി ജോസഫിനൊപ്പം അഖില്‍ പി ധര്‍മ്മജൻ ചെയ്തിട്ടുണ്ട്.