Published on: February 18, 2025
ഉരുണ്ടുകളി
ഉ
രുളയാക്കി നീട്ടിടുമ്പോൾ
കൈകടിച്ച വായകൾ
പന്തടിച്ച് മാറവെ
മോന്ത കൊണ്ട പ്രാന്തുകൾ
വീർപ്പടക്കി നിന്നതൊക്കെ
പൊട്ടിടും ബലൂണുകൾ
കളിക്കാല ചുണ്ടിനാ-
ലൂതി വീർത്ത കുമിളകൾ
കട്ടുതിന്ന് വിങ്ങിടും
ഉരുണ്ട മധുരമഞ്ഞയും
പിഴച്ച് വീണൊരുന്നമായി
തോറ്റ് പോയ ഗോലികൾ
ഇടം നെഞ്ചിൽ ഉരുണ്ടേറി-
യൊളിക്കുന്ന നോവിറക്കം
ഉരുണ്ടിടും പിരണ്ടിടും
വാക്കുടക്കി വഴുതിടും
പരപ്പുകൾ, നിരപ്പുകൾ
മേലെയേറി നീങ്ങിടും
ഉളുപ്പു പോയിളിക്കുന്ന
കോമാളിത്തൊപ്പി, മണ്ട.
പ്രസാദ് കാക്കശ്ശേരി: തൃശൂർ കാക്കശ്ശേരി സ്വദേശി. പൊന്നാനി തൃക്കാവ് ഗവ.ഹയർസെക്കൻററി സ്കൂൾ അധ്യാപകൻ. കാലടി ശ്രീശങ്കരാചാര്യ സംസ്കൃത സർവകലാശാലയിൽ നിന്ന് എം. എ. മലയാളം ഒന്നാം റാങ്കോടെ വിജയിച്ചു. കലിക്കറ്റ് യൂണിവേഴ്സിറ്റിയിൽ നിന്ന് എം. ഫിൽ ലഭിച്ചു.
സായാഹ്ന ഫൗണ്ടേഷൻ ഡിജിറ്റൽ പ്രസാധനത്തിലൂടെ, ‘ചുനയൊലിച്ചതിൽ പാടുകൾ’, ‘നഖം; ക്ഷതവും ചിത്രവും’, ‘ഗിരി’, ‘തണുപ്പ്; ചില സ്വകാര്യങ്ങൾ’, ‘അച്ചുപിഴ’, ‘തല ആലോചനയോട് ചേർന്ന ഒരു രാത്രി’ എന്നീ കവിതാ സമാഹാരങ്ങൾ പ്രസിദ്ധീകരിച്ചിട്ടുണ്ട്.
