നഷ്ടമായ ആയത്ത്
മാനത്തിന്റെ ഖൽബിനുള്ളിൽ നിന്നും
വെള്ളിനൂൽ പുഞ്ചിരി വീഴുന്നു—
ഇന്ന്,
ഈ രാവിൽ,
ഈ ഈന്തപ്പനയുടെ ചോട്ടിൽ,
മറ്റൊരു ഒറ്റത്തടിപ്പനപോലെ,
പിറവി ചന്ദ്രന്റെ വിരൽസ്പർശമേറ്റു കിടക്കുമ്പോൾ
മനസ്സിൽ ഒരു സൂറത്ത് തെളിയുന്നു.
എന്നോ മടക്കി വെച്ച പുസ്തകത്തിലെ
ആ താളുകൾ വീണ്ടും മറിഞ്ഞുപോകുന്നു.
അന്ന്…
പിടയ്ക്കുന്ന ആ മൗനത്തിന്റെ
ഖൽബിനുള്ളിൽ നിന്നും ആദ്യമായി പുറത്തുവന്ന
ആ ആയത്ത്,
തസ്ബീഹ് പോലെ,
ഇന്നും പിടപ്പോടെ ഉരുക്കഴിക്കപ്പെടുന്നുണ്ട്,
നെഞ്ചിൽ.
ഒരു കൂറ്റൻ തിരമാല,
ഒരൊറ്റ ദുആയോടെ,
ഒരു മണൽസമുദ്രം മുഴുവൻ നീന്തുകയാണ്…
നഷ്ടമായതെന്തോ തിരഞ്ഞ്…
പ്രതിഭാവം വാട്സ്ആപ്പ് ഗ്രൂപ്പിലേക്കു സ്വാഗതം🌹
സതീഷ് കളത്തിൽ: തൃശൂർ ശങ്കരയ്യ റോഡ് സ്വദേശി. പ്രതിഭാവം എഡിറ്റർ, ഉത്തരീയം കലാ- സാംസ്കാരിക മാസികയുടെ അസോ. എഡിറ്റർ. ‘ദോഷൈകദൃക്ക്’ എന്ന പേരിൽ പ്രതിഭാവത്തിൽ ‘വോക്കൽ സർക്കസ്’ എഐ കാർട്ടൂൺ കോളവും ചെയ്യുന്നു.
ചലച്ചിത്ര സംവിധായകൻ. മൊബൈൽ ഫോണിൽ ചിത്രീകരിച്ച ഇന്ത്യയിലെ ആദ്യത്തെ ചലച്ചിത്രങ്ങളായ വീണാവാദനം(ചിത്രകലാ ഡോക്യുമെന്ററി), ജലച്ചായം(ഫീച്ചർ ഫിലിം) എന്നിവയും ലാലൂരിന് പറയാനുള്ളത്(പരിസ്ഥിതി ഡോക്യുമെന്ററി), ജ്ഞാനസാരഥി(ഹിസ്റ്ററി ഡോക്യുമെന്ററി) എന്നിവയും ചെയ്തിട്ടുണ്ട്. തൃശ്ശൂർ ആസ്ഥാനമായി പ്രവർത്തിക്കുന്ന ഡിജിറ്റൽ ഫിലിം മേക്കേഴ്സ് ഫോറം ട്രസ്റ്റിന്റെ ചെയർമാനാണ്.
പിതാവ്: ശങ്കരൻ. മാതാവ്: കോമളം(Late). ഭാര്യ: കെ.പി. രമ. മക്കൾ: നിവേദ, നവീൻകൃഷ്ണ, അഖിൽകൃഷ്ണ.
