സാമൂതിരി കൊട്ടാരം ഭിഷ്വഗരൻ കൂടിയായിരുന്ന രാമവാര്യരെകുറിച്ച്, അദ്ദേഹത്തിന്റെ പേരക്കുട്ടിയും മലയാളത്തിലെ പ്രമുഖ എഴുത്തുകാരിയുമായ സന്ധ്യ ഇ പ്രസിദ്ധീകരിച്ച, ‘ഡോ. ഇ. രാമവാര്യർ- ഞാൻ കാണാത്ത എന്റെ അച്ഛച്ഛൻ’ എന്ന ജീവചരിത്ര കൃതിയിൽ ലേഖനം പൂർണ്ണമായും ഉൾപ്പെടുത്തിയിരിക്കുന്നു.

താനിതുവരെ കണ്ടിട്ടില്ലാത്ത, എഴുത്തുകാരനും ഡോക്ടറുമായിരുന്ന തന്റെ അച്ഛച്ഛന്റെ സാന്നിധ്യം ഓർമ്മവെച്ച കാലംമുതലേ തന്നോടൊപ്പമുണ്ടെന്ന് എഴുത്തുകാരി വിശ്വസിക്കുന്നു. അദ്ദേഹം ഉപയോഗിച്ച വസ്‌തുക്കളും പറഞ്ഞുവെച്ച വാക്കുളും വെച്ചുപിടിപ്പിച്ച മരങ്ങളും ഉൾപ്പെടെ അദ്ദേഹത്തിന്റെ ഓരോ നിശ്വാസവും ഒപ്പിയെടുത്ത, അദ്ദേഹം താമസിച്ചിരുന്ന വീടും എല്ലാം ജീവിതത്തിൽ എഴുത്തുകാരിയെ അത്രമേൽ സ്വാധീനിച്ച ഘടകങ്ങളാണ്. അച്ഛച്ഛനുമായി ബന്ധപ്പെട്ട, ബന്ധുക്കൾ ഉൾപ്പെടെയുള്ള വ്യക്തികളിൽ നിന്നുള്ള കേട്ടറിവുകളിലൂടെ തന്നിലേക്കാവാഹിക്കപ്പെട്ട ആ സവിശേഷ വ്യക്തിപ്രഭാവത്തെയാണ് ഈ ലഘുകൃതിയിലൂടെ എഴുത്തുകാരി നമ്മളിലേക്കെത്തിക്കുന്നത്.

‘ഏതെങ്കിലും വിധത്തിൽ ചരിത്രം തിരുത്തിക്കുറിക്കുകയോ വലിയ സ്ഥാനമാനങ്ങൾ അലങ്കരിക്കുകയോ ചെയ്ത‌ ഒരാളായിരുന്നില്ല തന്റെ അച്ഛച്ഛനെങ്കിലും തീരെ സാധാരണക്കാരനുമായിരുന്നില്ല’ എന്നൊരു തിരിച്ചറിവും അതിനുതകുന്ന ഉത്തമ ബോധ്യങ്ങളുമാണ് ഇങ്ങനെയൊരു കൃതി എഴുതുവാൻ കാരണമെന്നും അതൊരു നിയോഗമാണെന്നും എഴുത്തുകാരി പറയുന്നു.

അക്കാലത്ത്, പ്രശസ്‌തനായിരുന്ന ഒരു ഭിഷഗ്വരനായിരുന്നെങ്കിലും അച്ഛച്ഛൻ എഴുതിയ നാമമാത്രമായ ചില വൈദ്യശാസ്ത്ര ലേഖനങ്ങളല്ലാതെ മറ്റെഴുത്തുകൾ, ഓർമ്മക്കുറിപ്പുകളായോ അനുഭവക്കുറിപ്പുകളായോ ലഭ്യമല്ലെങ്കിലും തനിക്ക് അച്ഛച്ഛനെ കുറിച്ച് എഴുതാതിരിക്കാൻ കഴിയില്ല എന്നിടത്തു നിന്നാണ് ഈ കൃതി പൂർണ്ണമായത് എന്നും എഴുത്തുകാരി കൂട്ടിച്ചേർക്കുന്നു.

അതിന്റെ കാരണവും എഴുത്തുകാരി സന്ധ്യ ഇ വ്യക്തമാക്കുന്നു:
“ഒരുപക്ഷേ ഞാനെഴുതിയില്ലെങ്കിൽ മറ്റാരെങ്കിലും എഴുതുമോ എന്നെനിക്കുറപ്പില്ല. എവിടെയും രേഖപ്പെടുത്താതെ അദ്ദേഹവും മൺമറഞ്ഞുപോകും. അത്രയും വൈവിധ്യം നിറഞ്ഞതും സംഭവ ബഹുലവുമായ ഒരു ജീവിതത്തിലൂടെ കടന്നുപോയ ഒരാൾക്കതു സംഭവിച്ചുകൂടാ.”

ഗുരുവായൂർ തീർത്ഥം പബ്ലിക്കേഷൻസ് പുറത്തിറക്കിയ പുസ്തകത്തിന് അവതാരിക എഴുതിയത്, ഡോ. ആർ. വി. രാംലാൽ ആണ്.