ഞങ്ങളുടെ വീട്ടിലെ
കോഴിക്കൂട്ടിൽ
മുട്ടയിടുന്ന പിടക്കോഴിക്കായി
പൂവൻകോഴി
ഏഴു തവണ സ്ഥലം നോക്കും.

മുട്ടയിടാൻ യോജിച്ച സ്ഥലം കണ്ടെത്തി
പിടക്കോഴിക്ക്
അതിൽ ഇരുന്ന് കാണിച്ചുകൊടുക്കും.

അതുകഴിഞ്ഞ് പിടക്കോഴി വന്ന്
മുട്ടയിടുന്ന കൂടിന് പുറത്ത്
കാവൽ നിൽക്കുന്ന പൂവൻകോഴി
‘കൊക്കരക്കോ’ എന്ന് കൂവും.

ആ സമയം
​ഞങ്ങളുടെ വീടിന്നടുത്ത്
ഇരുട്ടുമുറിയിൽ
പെറ്റെണീറ്റ ഒരമ്മ
തന്നെ പറ്റിച്ചുപോയ ഭർത്താവിനെ
വായിൽ തോന്നുന്നതൊക്കെ
വിളിച്ച് പറഞ്ഞ്
പ്രാകികൊണ്ടിരിക്കും.